Gazeta Si - Zjarri ka një perimetër prej gati 30 kilometrash. "Është ndoshta më e ndërlikuara që kemi pasur në Kanarie, të paktën në 40 vitet e fundit", - u tha guvernatori gazetarëve.
Zjarri i madh që shpërtheu mbrëmjen e së martës në Tenerife u zhvillua në një zonë të pjerrët dhe malore, e vështirë për ekuipazhet e emergjencës.
Autoritetet spanjolle kanë deklaruar se objektivi i tyre kryesor është të frenojnë flakët dhe t'i pengojnë ato të arrijnë në zonat më të populluara. Qyteti kryesor i ishullit, Santa Cruz, ndodhet 20 kilometra nga zona e prekur.
Zjarri kërcënon gjashtë komuna. Rreth 7600 banorë të zonës janë evakuuar ose janë urdhëruar të qëndrojnë brenda për shkak të cilësisë së dobët të ajrit.
Zyra e turizmit në Tenerife, nënvizoi në një deklaratë se zonat kryesore turistike dhe qytetet e ishullit janë larg zjarrit.
Aktivitetet vijojnë normalisht në ambientet akomoduese, plazhet dhe vendet e tjera turistike që ndodhen në zonat pranë bregdetit dhe në qendër.
Por aksesi në Parkun Kombëtar Teide, atraksioni më i rëndësishëm turistik i Tenerifes pas plazheve, do të jetë i mbyllur për publikun.
Të gjitha objektet turistike rreth zonës së vullkanit Teide, përfshirë akomodimin, do të evakuohen, së bashku me stafin e Institutit të Astrofizikës në Ishujt Kanarie.
Muajin e kaluar, më shumë se 2,000 njerëz u evakuuan, pasi një zjarr në ishullin fqinj La Palma preku rreth 4,500 hektarë.
Sipas të dhënave nga qeveria spanjolle, në shtatë muajt e parë të vitit flakët dogjën pothuajse 64 mijë hektarë në vend. Kjo është shifra e tretë më e lartë në dekadën e fundit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.