.png)
Si për ironi të fatit, energjia elektrike ka ikur edhe në Kryesinë e Kuvendit të Shqipërisë, pikërisht kur në Komisionin për Ekonominë dhe Financat, diskutohej marrëveshja e huasë mes BERZH-it dhe OSHEE-së.
Arsyeja e ikjes së dritave për 6 minuta, duket se ka qenë një shkëndijë elektrike e ndodhur në kabinën private në pronësi të Kullave Binjake, duke sjellë stakimin e saj në të gjithë zonën.
Operatori i Shpërndarjes së Energjisë Elektrike, ka sqaruar se stakimi i energjisë, u bë me qëllim sigurimin e zonës dhe menjëherë u manovrua duke rikthyer energjinë përmes linjës së dytë.
Shkak i rënies së zjarrit, ka qenë “zhvillimi i një harku të madh elektrik, pasi mungonte izolacioni i pajisjeve të këtij subjekti, që ka detyrim ligjor për të kryer mirëmbajtjen e kabinës që posedon si aset”.
Në bazë të protokolleve të sigurisë për impiantet, u procedua për stakim të menjëhershëm të linjës L12, për të penguar thellimin e avarisë në kabinë, që të mos përbënte rrezik për jetën e personelit, të komunitetit dhe të vetë impianteve.
Si pasojë e stakimit të linjës, mbeti pa energji elektrike Kuvendi i Shqipërisë (10:57 – 11:03), i cili gjatë kësaj kohe nuk mundi të fuste në operim gjeneratorin, për shkak të një anomalie mekanike në ndezje.
Megjithëse dritat u shkëputën, mbledhja, e cila po transmetohej online në faqen zyrtare të Kuvendit vijoi dhe u shoqërua me debat mes ministres së Energjisë dhe Infrastrukturës, Belinda Balluku dhe deputetit demokrat, Arbi Agalliu, pasi ky i fundit nisi të bënte foto.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
