.png)
Në raportin e fundit të Fondit Monetar Ndërkombëtar, FMN, për Shqipërinë, jepen pesë rekomandime për problematikat fiskale në vend.
Ekspertët fiskalë të FMN-së, përcaktojnë se administrata tatimore duhet të fokusohet në menaxhimin e taksave të prapambetura. Reduktimin e detyrimeve dhe fshirjen e borxheve të pambledhshme. Rimbursimin e TVSH-së, menaxhimin e grupeve të rrezikut.
Autoriteti ndërkombëtar i sugjeron Tatimeve që përfundimin e një strategjie kundër grupeve me rrezik ta realizojë në terma afatshkurtër, 1-12 muaj, pra brenda një viti.
Të njëjtin afat ka edhe për rimbursimet e TVSH-së, deri në zerimin e saj.
FMN rithekson se propozimi për draftligjin e amnistisë fiskale në Shqipëri, nuk është pëlqyer nga Bashkimi Europian dhe vetë Fondi.
Sugjerohet që nën politikat e parandalimit të pastrimit të parave, të krijohet regjistri me llogaritë bankare nga bankat tregtare dhe të administrohet nga Drejtoria e Përgjithshme e Tatimeve.
Autoriteti ndërkombëtar këshillon që njohuritë teknologjike të punonjësve në DPT të përmirësohen dhe vendet vakante të mbushen sa më shpejt.
Rekomandohet dhe monitorimi i taksapaguesëve të mëdhenj.
Sugjerimet sipas rreziqeve ekzistuese nga FMN:
Menaxhimi i borxhit tatimor dhe ulja e detyrimeve të prapambetura
Niveli në rritje i detyrimeve të prapambetura tatimore duhet të stabilizohet dhe të vihet në një trajektore në rënie. Duhet të zgjerohet përdorimi i pagesës së kësteve tatimore dhe duhet të zgjiedhet çështja e borxhit të arkëtueshëm, siç lejohet në Ligjin për Procedurat Tatimore. Duhet të përmirësohen marrëveshjet për ndërmarrjen e veprimeve të falimentimit dhe zhvillimin e ekspertizës së nevojshme të stafit. Sipas raportit, deri në shtator 2020, numri i tatimpaguesve që kishin detyrime të prapambetura ishte 171 mijë (nga të cilët 96 mijë janë aktivë) dhe stoku total i borxhit ishte 122 miliardë lekë (prej të cilit 83 miliardë lekë e kanë bizneset jo active). FMN thotë se ekziston një nevojë kritike për të shlyer borxhin e paarkëtueshëm kur është joekonomike të ndiqet ose nuk mund të rikuperohet ligjërisht.
Shërbimi i Tatimpaguesve dhe Rimbursimet e TVSH-së
Diapazoni, thellësia dhe qartësia e udhëzimeve për interpretimin dhe procedurat e ligjit tatimor duhet të përmirësohen. Duhet të vazhdojë progresi në reduktimin e detyrimeve të prapambetura të rimbursimit të TVSH-së me objektivin e shlyerjes së plotë të detyrimeve të prapambetura. Marrëveshjet e rimbursimit me këste duhet të hiqen dhe bizneset me TVSH negative në çdo periudhë duhet të kenë të drejtë për rimbursim pa parakushte tepër kufizuese.
Fleksibiliteti organizativ dhe ngritja e aftësive të personelit
DPT duhet të përputhë më mirë burimet e saj me rreziqet e reja dhe nevojat operacionale dhe duhet të ketë më shumë autonomi dhe fleksibilitet në vendosjen e stafit, shpërndarjen e punës dhe ndryshimet organizative, pa pasur gjithmonë nevojë për miratimin e ministrit. Niveli i aftësive dhe kompetencave teknike në të gjithë fuqinë punëtore duhet të përmirësohet ndjeshëm – më kritike në fushat e kontrollit tatimor, analitikës së të dhënave, zbatimit të borxhit tatimor, funksioneve të Zyrës së Tatimpaguesve të Mëdhenj (TM) dhe interpretimit të ligjit tatimor.
Menaxhimi i Rrezikut të Përputhshmërisë (CRM) dhe Raportimi i Informacionit Bankar
Analiza e të dhënave duhet të intensifikohet për të identifikuar grupet kryesore të rrezikut që nuk janë në përputhje me rregullat, që përbëjnë pjesën më të madhe të hendekut tatimor. Raportimi automatik në DPT i informacionit kryesor të llogarisë financiare të rezidentëve shqiptarë (si marrëveshjet aktuale të raportimit për jorezidentët) do të rriste shumë profilin e rrezikut dhe do të përmirësonte saktësinë e deklarimit tatimor.
Auditimi dhe Menaxhimi i Tatimpaguesve të Mëdhenj
Aktiviteti dhe rezultatet e auditimit duhet të vlerësohen më sistematikisht, veçanërisht kur fokusi të zhvendoset në auditimin në zyrë pas fiskalizimit. Duhet të përfundojë profili i rrezikut të të gjitha kompanive të Drejtorisë së Tatimpaguesve të Mëdhenj (DTM) (duke përdorur kornizën e diferencimit të këshilluar nga Departamenti i Çështjeve Fiskale (DÇF). Vendimet për përzgjedhjen e rasteve të auditimit të VAGJ duhet të merren kryesisht nga njësia e menaxhimit të rrezikut të VAGJ (në vend të departamentit qendror të rrezikut).
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
