.png)
Në kohën kur qeveritë e Londrës dhe Tiranës po përplasen për çështjen e emigrantëve, e ku debatit më të fortë është përfshirë edhe vetë kryeministri Edi Rama, Britania e Madhe ka kthyer mbrapsht 22 shqiptarë të cilësuar si “kriminelë”.
Sipas medias britanike Daily Mail, shqiptarët e kthyer me anë të një fluturimi sekret u larguan të mërkurën në mëngjes.
“Fluturimi i fshehtë për në kryeqytetin Tiranë u autorizua personalisht nga Sekretarja e Brendshme Suella Braverman në një përpjekje për të penguar shqiptarët të futen në Britani duke kaluar Kanalin me varka të vogla nga Franca”, thuhet në këtë artikull.
Disa nga shqiptarët besohet se janë caktuar për dëbim në javët e fundit gjatë verifikimit në kampin e përpunimit të Manston në Kent, i cili ka luftuar për të përballuar një rritje të mijëra mbërritjeve me varka. Sipas të përditshmes britanike ata kanë mbërritur aeroportin e Rinasit në Tiranë.
Secili prej tyre kishte pasaportën e vulosur nga qeveria shqiptare që tregonte se ata janë të ndaluar të hyjnë në zonën Shengen të Evropës për tre vjet. Kjo do të thotë se ata nuk mund të përdorin viza 90-ditore të hyrjes në BE që i lejojnë të udhëtojnë, të ngasin makinën ose të marrin autobusë në Francën veriore ose Belgjikë për një kalim në Kanalin e La Manshit. Sipas Ministrisë së Brendshme, rreth 120 shqiptarë u dërguan në fluturime dëbimi muajin e kaluar.
Muajin e kaluar në total, 347 persona u deportuan, duke përfshirë 118 në Shqipëri, 39 në Brazil, 38 në Rumani, 26 në Poloni dhe 20 në Lituani, sipas shifrave nga Ministria e Brendshme e publikuar këtë javë.
Shumica – 230 – ishin kriminelë, duke përfshirë një përdhunues xhamajkan, një shqiptar të burgosur për më shumë se nëntë vjet për krim të dhunshëm dhe një vrasës malajzian që u dënua me burgim të përjetshëm.
Pjesa tjetër ishin emigrantë të paligjshëm, përfshirë emigrantë me varka. Vetëm këtë vit, 12,000 shqiptarë kanë kaluar Kanalin për të kërkuar azil ose për të punuar në tregun e zi të lulëzuar ose ekonominë kriminale të Britanisë. Ato përfshijnë fermat e kanabisit dhe bizneset me para të gatshme si lavazhot e makinave.
Ardhja e tyre e paligjshme ka rritur numrin total të hyrjeve me anije në 40,000 këtë vit. Disa burime thonë se 10,000 të tjerë, shumë shqiptarë, mund të mbërrijnë deri në Vitin e Ri. Rreth 9,000 emigrantë kaluan Kanalin La Mansh vitin e kaluar në nëntor dhe dhjetor në det të qetë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
