.png)
Agjentët federalë amerikanë zhvilluan një "aktivitet për zbatimin e ligjit" të martën në rezidencën në Uashington të oligarkut rus, Oleg Deripaska, një aleat i ngushtë i presidentit rus, Vladimit Putin.
Agjentët zhvilluan "një aktivitet për zbatimin e ligjit të autorizuar nga gjykata", tha një zëdhënës i FBI-së. Zyrtarë nuk ofruan informacione të mëtejshme për rrethanat e prezencës së tyre, apo ndonjë informacion për hetime të mundshme ku mund të përfshihet zoti Deripaska.
Shtetasi i pasur rus që e ngriti pasurinë nëpërmjet biznesit të aluminit, është një aleat i ngushtë i zotit Putin dhe u përmend disa herë në raportin e prokurorit të posaçëm Robert Mueller për ndërhyrjen në zgjedhjet presidenciale të vitit 2016.
Deripaska mbante lidhje edhe me Paul Manafortin, ish-drejtori i fushatës elektorale të ish-presidentit Trump, i cili u gjet fajtor për tetë krime financiare në kuadrin e hetimeve të Prokurorit Mueller. Manafortit iu dha më vonë falja nga presidenti i atëhershëm Trump.
Gjatë administratës së ish-presidentit Trump, Departamenti i Thesarit kishte hequr gjithashtu sanksionet financiare ndaj tre kompanive të lidhura me Deripaskan.
Zyrtarët thanë në atë kohë se kishin vepruar kështu, pasi aksionet e drejtpërdrejta dhe indirekte të Deripaskas në këto kompani ishin zvogëluar deri në pikën që ai nuk kishte më kontroll mbi to. /VOA/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
