.png)
Nga Gazeta ‘Si’-Euro po e mbyll javën në një minimum të ri historik.
Sipas kursit zyrtar të Bankës së Shqipërisë, një euro po këmbehet me 104.36 lekë, 0.22 lekë më pak se dy ditë më parë.
Në fillim të vitit, euro këmbehej me 114.54 lekë ndërsa tani leku është forcuar me 10.2 lekë, ose 8.8%.
Në tendencë rënëse ishin dhe valutat e tjera. Dollari ra me 0.9 lekë, në 95.85 lekë, duke u luhatur në nivelet më të ulëta të 12 viteve të fundit.
Paundi britanik zbriti në 122.21 lekë, ose 0.27 lekë më pak se dy ditë më parë.
Në rënie ishte dhe franga zvicerane, me 0.15 lekë, duke u këmbyer me 107.07 lekë.
Vitet e kaluar, përgjithësisht rënia sezonale niste në mes të korrikut e kulmonte në gusht, por këtë vit nënçmimi i valutave ka qenë i pranishëm pothuajse përgjatë gjithë vitit dhe është intensifikuar ndjeshëm që nga maji.
Në tregjet europiane, euro lëvizi rreth nivelit 1.09 dollarë ndërsa investitorët vlerësuan potencialin për një periudhë të zgjatur të normave më të larta të interesit kundrejt të dhënave që tregojnë një ngadalësim të rritjes ekonomike dhe lehtësimin e presioneve inflacioniste në të gjithë zonën e euros.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
