.png)
Nga Gazeta ‘SI’ - Enti Rregullator i Energjisë ka nisur procedurat e miratimit të një çmimi të ri blerje për energjinë fotovoltaike dhe eolike, bazuar në vlerat reale.
Deri më tani, çmimi i kësaj energjie ishte përllogaritur si një mesatare e çmimeve, e arsyeshme dhe për investimin. Por tani, me zhvillimin e energjisë nga era dhe dielli, ERE do ta përllogarisë atë me referenca të sakta dhe reale. Çmimi i ri do të jetë për fotovoltaikët me kapacitet të instaluar deri në 2MW dhe eolikët deri në 3MW.
Aktualisht çmimi i miratuar për energjinë që blihet nga shteti nga burimet fotovoltaike me kapacitet deri në 2MW është 71.2 euro/MWH ndërsa ai nga eolikët 75.64 euro/MWH.
Këto çmime kanë ardhur në rënie në raport me çmimet e miratuara në fillim nga Enti Rregullator i Energjisë kur për eolikët ishte 100 euro/MWh dhe për eolikët 76 euro/MWh.
Gjatë seancës së Bordit përfaqësues të Entit thanë se tashmë pjesa e burimeve të rinovueshme të energjisë mbulohet nga një ligj i ri i miratuar në vitin 2023, por që për të duhet të miratohen ende aktet nënligjore në mënyrë që të bëhet i zbatueshme.
Nxitja e prodhimit të energjisë nga burimet e rinovueshme parashikon ndër të tjera ofrimin e një çmimi të leverdishëm që garanton kthim të arsyeshëm investimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
