.png)
Ministria e Brendshme ka publikuar listën me emrat e personave të përzgjedhur që u është besuar rivlerësimi i integritetit, aftësisë profesionale dhe pasurisë të të gjithë trupës së Policisë së Shtetit, duke nisur që nga maja më e lartë, pra Drejtori i Përgjithshëm i saj, e deri tek efektivi më i thjeshtë në terren.
Janë pesë komisionerë anëtarë të Komisionit të Vlerësimit të Jashtëm, 5 anëtarë të zgjedhur nga Inspektoriati i Deklarimit dhe Kontrollit të Pasurive, pesë përfaqësues nga Universiteti i Tiranës dhe 15 anëtarë të Sekretariatit Teknik.
Pra, në total janë 30 emra pjesë e strukturave të rivlerësimit, plus 6 të tjerë që janë zëvendësuar, katër për anëtarët e Komisionit të Jashtëm të Vlerësimit dhe dy për Komisionin e ILDKPI-së.
Sa i takon funksionimit procesi do të nisë larg vëmendjes mediatike dhe publike dhe faza e parë është kontrolli i pasurisë, ku do të krahasohen të dhënat e ILDKPI-së ndër vite me vetëdeklarimet e plotësuara në formularët përkatës nga punonjësit e Policisë së Shtetit, Gardës dhe Shërbimit për Çështjet e Brendshme dhe Ankesat.
Procesi është i ngjashëm me vettingun në drejtësi dhe ashtu siç vettingu në drejtësi nisi nga Gjykata Kushtetuese, pra nga maja e piramidës së këtij sistemi, edhe vettingu në polici do të nisë me kupolën drejtuese të strukturës.
Pra, procesi do të nisë më Drejtorin e Përgjithshëm të Policisë së Shtetit, Ardi Veliu, për të vijuar më pas në mënyrë hierarkike me drejtuesit në qarqe e rrethe dhe deri tek efektivi më i thjeshtë në terren. Të drejtën për t’iu nënshtruar vettingut dhe për t’u rikthyer si pjesë e uniformave blu e kanë edhe persona e larguar nga policia, por jo kur kanë më shumë se dy vite të shkëputur prej saj.
Anëtarët e Komisionit të Jashtëm të Vlerësimit:
- Ana Kapaj
- Artur Baku
- Marjeta Gjelaj
- Sonila Kadareja
- Viktor Bërdo
Nga kandidaturat e përcjella nga Rektorati i Universitetit të Tiranës u përzgjodhën:
- Ela Kërka
- Elda Kuka (Balili)
- Elida Liko
- Ledian Rusta
- Mirela Ujkani (Miti)
Anëtarë zëvendësues të anëtarëve të Komisionit të Jashtëm të Vlerësimit u përzgjodhën kandidatët, sipas renditjes:
- Nertila Sadedini (Murati)
- Bledar Ilia
- Arta Lleshi
- Elton Muça
Anëtarë të Sekretariatit Teknik u përzgjodhën kandidatët:
- Amarildo Kurti
- Arta Lleshi
- Eralda Bajollari
- Erjena Bashari
- Erlisa Shkodrani
- Floris Muho
- Gent Pejo
- Gëzim Selmani
- Ilva Mitro
- Iva Guçe
- Klevi Hajdini
- Marjana Çela
- Marjeta Përlala
- Suela Pashaj
- Laert Elmazaj
Inspektoriati i lartë i Deklarimit dhe Kontrollit të Pasurive dhe Konfliktit të Interesave ka caktuar si anëtarë të Komisionit të Jashtëm të Vlerësimit, punonjësit:
- Elvira Dabërdaku, inspektor
- Adriana Meko, inspektor
- Zamira Gjini, inspektor
- Alban Laska, inspektor
- Besnik Hodo, inspektor
Anëtarë zëvendësues janë:
- Dhimitrulla Spiro, inspektor
- Vjollca Koçollari, inspektor
Vettingu në radhët e Policisë së Shtetit mori shtysë nga i njëjti person që ishte aktori kryesor në vettingun e drejtësisë: Fatmir Xhafaj. Pak pasi mori detyrën e ministrit të Brendshëm, pas largimit të Saimir Tahiri, ai njoftoi planin për të kaluar në sitë të gjithë personat që vishnin uniformën e policisë.
Nisma ishte edhe një përgjigje e tërthortë ndaj akuzave të opozitës dhe hetimeve të prokurorisë në atë kohë, ku disa emra drejtuesisht kryesorë të policisë, sidomos në Qarkun e Vlorës, përfliteshin si të përfshirë në trafikun e drogës në drejtim të Italisë.
Por, kjo nuk zbuti akuzat e Partisë Demokratike, përkundrazi i përqendroi ato në drejtim të vetë Fatmir Xhafajt, të cilin opozita e akuzonte për një qëndrim me dy standarde.
“Ju të bëni vetting, Ministri juaj të mos bëjë. E drejtë është kjo miq? Absolutisht jo! Derisa të bëjë vettingun ai, ne nuk i ndahemi”, u drejtohej ish-Kryeministri Sali Berisha disa punonjësve të Policisë së Shtetit gjatë protestës së opozitës të 26 majit të 2018.
Deklarata i referohej faktit që vettingu në radhët e Policisë së Shtetit nuk përfshinte ministrin e Brendshëm. Nga mazhoranca u mbrojtën duke thënë se posti i ministrit të Brendshëm ishte politik, ndryshe nga statusi që gëzojnë punonjësit e Policisë së Shtetit, si të depolitizuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
