Disa detaje të fundit ndajnë zyrtarizimin e Elseid Hysajt te Lacio. Mbrojtësi i Kombëtares thuajse ka mbyllur gjithçka me klubin e ri, ku drejtor sportiv është ish-kapiteni kuqezi Igli Tare dhe trajner ai që e ka lançuar shkodranin në futbollin e madh, Mauricio Sarri.
Sipas prestigjiozes italiane, “La Gazzetta dello Sport”, palët kanë arritur akordin dhe zyrtarizimi do të bëhet pas datës 30 qershor, kur përfundon kontrata e tij me Napolin. Hysaj, po sipas gazetës italiane, do të përfitojë mbi 1.5 milionë euro në sezon te Lacio, ku do të firmosë një kontratë 4-vjeçare.
Mbrojtësi shqiptar ishte një ndër emrat kryesorë në listën e kërkesave të trajnerit Sarri për të forcuar organikën. Dhe klubi po ia plotëson dëshirën. Fanella e Lacios do të ishte e 3-ta në Serinë A për Elseid Hysajn, pas atyre të Empolit dhe Napolit. Në moshën 27-vjeçare, shkodrani është më i mjekur se kurrë si futbollist.
Sa u takon kuqezinjve, ka bërë prezantimin te skuadra e re mesfushori Ylber Ramadani. Kosovari ka lënë Vejlen në Danimarkë dhe ka nënshkruar në Hungari, me skuadrën e MTK Budapest.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.