Dalin detaje të reja nga vrasja e 32-vjeçarit Ilir Kuçi, mbrëmjen e kaluar në Durrës.
Dyshohet se i riu është vrarë për prishjen e pazareve të drogës dhe atentatorët e kanë qëlluar 32-vjeçarin, në momentin që ka qenë duke parkuar makinën.
Nga hetimet e policisë rezulton se Ilir Kuçi ka qenë i dënuar në Itali për trafik narkotikësh. Ndaj tij ishin bërë disa denoncime nga qytetarët, të cilët pretendonin se ishin kërcënuar nga Kuçi.
Edmir Begu (Ilir Kuçi) ishte baba i një fëmije, ndërsa rezulton se ishte i papunë.
Dëshmitarët okularë për shkak të kushteve atmosferike nuk kanë fiksuar dot targën e mjetit dhe autorët, por Policia ka sekuestruar kamerat përreth për të mundur identifikimin e autorëve.
Ndërkohë, për të hedhur dritë mbi motivin, policia ka sekuestruar celularin e viktimës me qëllim analizimin e thirrjeve telefonike apo mesazheve.
Pavarësisht hetimeve, policia ende nuk ka një pistë të qartë mbi motivin dhe aq më pak autorët e ngjarjes, pavarësisht personave të dyshuar.
Ngjarja ndodhi pasditen e së dielës (24 janar) në lagjen numër 16 në Durrës. Viktima ndodhej pranë makinës se tij kur u qëllua me një breshëri automatiku nga një tjetër automjet.
Nga breshëritë e kallashnikovit, 32-vjeçari u qëllua në këmbë, në kokë dhe në pjesën e kraharorit.
Pas breshërive të armëve, Begu u dërgua menjëherë në spital, por nuk u mbijetoi plagëve, duke ndërruar jetë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
