.png)
“Shqipëria po humbet besimin e partnerëve europianë dhe po rrezikon negociatat”. Ky ka qënë paralajmërimi i grupit parlamentar i CDU-CSU në Bundestagun gjerman, i cili kryesohet nga partia e kancelares Angela Merkel.
Në një reagim zyrtar ai thekson se zhvillimet e fundit politike në Shqipëri kanë “errësuar” perspektivën e hapjes së negociatave me Bashkimin Europian në qershor.
Sipas zëdhënësit të grupit parlamentar, Florian Hahn, Shqipëria është duke humbur ndjeshëm besimin e partnerëve europianë.
"Shqipëria po humbet kredibilitetin e miqve evropianë. Nesë perspektivat për negociatat e pranimit në BE ishin ende rozë në mes të vitit të kaluar, tani janë errësuar nga retë të zeza”, thekson ai.
Sipas CDU / CSU protestat e vazhdueshme në Tiranë kanë paralizuar qeverinë dhe parlamentin si dhe të ardhmen europiane të Shqipërisë.
"Protestat dhe demonstratat jane të drejta qytetare dhe një tipar i demokracisë kur trajtohen në mënyrë adekuate, por deputetët shqiptarë po dëmtojnë demokracinë për dhe po shkaktojnë një bllokim politik. Vendimi i tyre për djegien e mandatit dhe nxitja e protestave të dhunshme nuk e ndihmon vendin apo popullin”, thuhet në deklaratën zyrtare të grupit parlamentar gjerman. Prandaj, i bëj thirrje miqve tanë në Shqipëri të tregojnë maturi. Qeveria dhe opozita duhet të fillojnë menjëherë diskutimet. Perspektiva evropiane është në rrezik", thekson CDU/CSU.
Ministria e Jashtme e Gjermanisë: Opozita ka gabuar me mandatet
Edhe Ministria e Punëve të Jashtme të Gjermanisë e quan të gabuar djegien e mandateve parlamentare të deputetëve të opozitës.
Në një prononcim për Deutsche Welle të enjten në Berlin, Ministria e Punëve të Jashtme shprehet se “platforma e duhur për zgjidhjen e konflikteve politike është Parlamenti.”
“Po i ndjekim me shumë vëmendje zhvillimet aktuale politike në Tiranë. Bojkotimin e Parlamentit dhe në veçanti dorëheqjen e deputetëve e konsiderojmë të gabuar. Platforma e duhur për të zgjidhur konfliktet politike është Kuvendi. Ngecja në vend nuk është opsion për Shqipërinë e sidomos kur Shqipëria është në pritje të vendimit të BE-së për çeljen e negociatave të anëtarësimit”, thuhet në deklaratë.
Ambasadorja e Gjermanisë në Tiranë, Suzane Shutz ka mbajtur të njëjtin qëndrim, ku përveç ftesës për dialog mes opozitës dhe mazhorancës, bëri thirrje që të shmanget çdo formë e dhunës.
Berlini: Akuzat e opozitës për vjedhje vote të trajtohen nga drejtësia
Në një deklaratë të dytë . Ministria e Jashtme gjermane ka theksuar se akuzat për mbarëvajtjen e zgjedhjeve të mëparshme duhet të trajtohen nga drejtësia dhe parlamenti.
“Akuzat që kanë të bëjnë me mbarëvajtjen e zgjedhjeve të mëparshme duhet të trajtohen dhe të gjykohen nga organet e drejtësisë dhe parlamenti. E drejta për të demonstruar është një element i rëndësishëm i kushtetutës demokratike”, thuhet në deklaratën e Ministrisë së Punëve të Jashtme gjermane.
Berlini zyrtar e cilëson dhunën si të papranueshme dhe u bën thirrje të gjitha palëve të përfshira që të ndihmojnë që protestat e mëtejshme të jenë paqësore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
