.png)
E sigurt është që shpërthimi me tritol i realizuar përmes një droni është i pari që ndodh në Shqipëri me këtë metodë, dhe ndonëse nuk shënoi viktima antiterrori, segmentet kundër krimit të organizuar shfaqen të alarmuara. “Ne shpresojmë që kjo mënyrë e re krimi të mos përdoret nga anëtarë të grupeve kriminale në lagjet e të cilëve është e vështirë të hysh”, – rrëfeu një oficer i lartë i policisë së shtetit, i cili u shfaq pesimist gjatë bisedës anonime me gazetën Si. Të njëjta burime treguan se si u zbulua i riu, i cili javën e parë të qershorit lëshoi një dron me lëndë plasëse në kantinën e pijeve ‘Gjergj Kastrioti”. Nga ky shpërthim i telekomanduar u konstatua se droni u lëshua në tarracën e godinës trekatëshe pranë hyrjes kryesore për në ambientet e godinës. “Në mes të qendrës ku u rrëzua droni me lëndë plasëse u pa një vatër shpërthimi që ka sjellë dëmtimin e pllakave të shtruara, si dhe lëndë inerte të shkëputura nga dyshemeja e të përhapura në mënyrë të çrregullt”, shkruan eksperti i njësisë antieksploziv në dosjen që gazeta Si disponon. Ekspertët detajojnë se mes dëmeve materiale llogariten edhe xhami i fasadës. Teksa kur janë mbledhur copëzat e paidentifikuara, është konstatuar se mjeti i përdorur për ngjarjen ishte dron.
Teksa kantina është nën pronësi të një politikani të njohur nga Durrësi, Lefter Koka, burimet e gazetës Si bëjnë me dije se numri i personave të pyetur është i lartë, dhe janë pikërisht dëshmitarët ata që kanë orientuar policinë drejt autorit që aktualisht është dërguar nën arrest me burg.
Dëshmitarët
“Pashë mbi shtëpinë time, në një rrugë që të çon në lagjen pas Gjykatës së Apelit dhe në rrugën që të çon tek kantina që po fluturonte një dron”, e nisi pohimin në polici njëri nga dëshmitarët që saktësoi se këtë gjë e pa në datën 7 qershor, ora 22 e mbrëmjes.
“Dola në lagje dhe konstatova një person me një qese blu në dorë dhe një kapele të zezë në kokë”, vijohet më tej në dosjen që gazeta Si po e zbardh ekskluzivisht.
Më tej shkruan policia e Durrësit, personat e kanë pyetur të panjohurin nëse ai e ka pasur dronin, por ai është përgjigjur se nuk ka lidhje me asnjë dron dhe në moment është larguar me shpejtësi prej tyre.
“Pasi e kanë ndjekur me makinë, banorët kanë arritur ta ndalojnë pranë një banese të braktisur dhe aty kur e kanë pyetur kanë mësuar se ai quhej G. M”. Në dosje detajohet se rezulton nga hetimi paraprak dhe flagrant i banorëve se ky person ishte nga fshati Sallmone, Shijak. Duke vijuar hap pas hapi, banorët kanë zbuluar në një distancë prej 150 metra edhe qesen e plastmasit, e cila kishte në brendësi pultin e dronit, një telefon të thyer dhe një palë doreza në ngjyrë gri.
Por përveç këmbënguljes së banorëve që i janë shprehur të sigurt policisë se G.M përpara se të kapej prej tyre kishte një qese blu në dorë, policia shton detaje të tjera.
“Në banesën e braktisur ku është ndaluar G.M u gjet një kapele me ngjyrë të zezë me mbishkrimin SPORT dhe një armë zjarri”.
Policia shprehet për gazetën Si se të dyja sendet e gjetura janë dërguar për ekspertim biologjik dhe balistik.
Mes shumë kontrolleve të ushtruara dhe mbasi G. M u dërgua në qeli për prodhim dhe mbajtje të lëndëve shpërthyese dhe shkatërrim prone me eksploziv si dhe kanosje, policia pranon se gjeti një armë në një automjet që i përket të dyshuarit. Por as në banesën e tij dhe as në lokalin në pronësi të tij nuk u gjet asnjë send i paligjshëm dhe as të dhëna me interes në telefonin e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
