Një ngjarje e rëndë ndodhi këtë të premte në Fier, ku një 52-vjeçar gjeti vdekjen në vend, pasi u godit me shkop nga djali i tij.
Policia në njoftimin zyrtar tha se 25-vjeçari Erdis Rapi goditi me shkop në kokë babanë e tij, Dhori Rapi.
Gazeta Si mëson se 52-vjeçari u qëllua me shkopin që i biri ruante dhentë.
Paraditen e sotme, ai sapo ishte kthyer nga Kumani ku do të merrte një rekomandim për të shtruar të birin në Spitalin Psikiatrik në Vlorë.
Pasi mbërriti në shtëpi, viktima i ka kërkuar të birit që të ruante dhentë, por ai e ka kundërshtuar dhe është konfliktuar fizikisht me të atin në oborrin e shtëpisë.
Pasi janë zënë e ka qëlluar prapa kokës me shkopin qe ruante dhentë.
Ndërkohë, të afërm të viktimës thonë se edhe i ati dhe i biri ishin të sëmurë mendorë.
52-vjeçari Dhori Rapi sipas dëshmitarëve, i binte shumë më qafe të birit, kjo edhe për shkak të problemeve mendore.
Babë e bir kanë pasur edhe më parë konflikte, dhe 25-vjeçari Erdis Rapi e ka kërcënuar duke i thënë se do ta vriste.
Sipas të afërmve familja jetonte në kushte shumë të rënda ekonomike.
Mësohet se viktima ka tre djem, autorin e vrasjes, një të martuar në Greqi dhe një 17-vjeçar. Ndërkohë, bashkëshortja e viktimës ka rreth 4 vjet që ka ndërruar jetë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.