Të dielën në mbrëmje Arturo Vidal zbarkoi në Milano, ku është duke kryer vizitat mjekësore, për t’u prezantuar më pas me fanellën e Interit. Mesfushori kilen ka lënë Barcelonën për t’u bashkuar me trajnerin Antonio Konte te zikaltrit. Edhe Lionel Mesi e ka përshëndetur mikun e tij pas largimit, duke shkruar se shpreson të takohet sërish me të.
Firma dhe komunikata zyrtare e Interit priten gjatë pasdites dhe nesër mesfushori do të jetë në stërvitje me skuadrën e re. Trajneri Konte ishte ai që këmbënguli për ta pasur në skuadër lojtarin me shumë përvojë dhe ka mundësi ta hedhë në fushë nga minuta e parë në ndeshjen e së shtunës me Fiorentinën.
Arturo Vidal vjen gratis, pasi atij i kishte përfunduar kontrata me Barcelonën. Kileni 33-vjeçar do të firmosë një kontratë dyvjeçare me Interin, nga e cila do të përfitojë 12 milionë euro neto në total. Ai do të mbajë fanellën me numër 22, ashtu si dhe te Barcelona, por, nëse Vesino do të shitet, lirohet edhe fanella me numër 8, e preferuar e lojtarit. Konte ka kështu një “armë” më shumë në kampionatin e ri për të rivalizuar më fort për titullin kampion me Juventusin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.