.png)
Gjykata e Tiranës ka caktuar masën e sigurisë detyrim me paraqitje për Ervin Matën, i përfshirë në sherrin e ndodhur në ish-Bllok në fillim të tetorit të vitit të kaluar.
Vetë Mata, që njihet si biznesmen, nuk është paraqitur në seancë, por kishte dërguar një shkresë ku autorizonte përfaqësimin e tij përmes një avokati.
Prokuroria nga ana tjetër kërkoi arrest me burg për të riun. Gjykata e ka hedhur poshtë kërkesën e organit të akuzës, nisur edhe nga fakti që ai u vetëdorëzua më 1 mars. Mata duhet të paraqitet në polici dy herë në muaj, përkatësisht të hënën e parë dhe të tretë të çdo muaji përgjatë gjithë periudhës së hetimeve.
Mata ndodhej prej rreth 4 muajsh në kërkim, ndërsa ende nuk dihet në çfarë kushtesh e ka ndërmarrë një veprim të tillë. Ervin Mata, u përfshi në konfliktin me armë të ndodhur në 5 tetor të vitit të kaluar në një lokal në ish-Bllok.
Si pasojë e këtij konflikti mbeti i vrarë Fabiol Gaxha dhe u plagosën 36 vjeçari Ervis Martinaj dhe Eljon Hato, 28 vjeç. Gaxha u qëllua për vdekje nga komandoja Mevjol Billo si pasojë e një përplasje me armë mes grupit të Ervis Martinajt dhe atij të Ervin Matës.
Fillimisht, pati dyshime se konflikti erdhi si pasojë e një ngacmimi që i ishte bërë të fejuarës së Matës, këngëtares së njohur Elvana Gjata, por hetimet vazhduan edhe për motive që kishin të bënin për prishje të pazareve të drogës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
