Nga Gazeta 'Si' - Të gjitha qendrat e votimit në katër komunat në veri të Kosovës, u mbyllën të dielën në orën 19:00.
Votimi, që u organizua për t’u mundësuar serbëve, shumicë në atë pjesë të vendit, shkarkimin e kryetarëve aktualë, do t’i lë ata në detyrë deri në fund të mandatit. Zgjedhjet e 21 prillit dështuan sa i përket pjesëmarrjes në votime.
Që votimi të ishte i suksesshëm duhet që të votonin, minimalisht, 50% + 1 e qytetarëve. Nëse përmbushej ky kusht, atëherë brenda afateve ligjore do mbaheshin zgjedhjet e jashtëzakonshme.
Komisioni Qendror i Zgjedhjeve (KQZ) tha se gjithsej kanë votuar 253 persona.
Në Leposaviq votuan 124 votues apo 0.91 për qind e shifrës totale, në Zubin Potok, 18 votues, apo 0.26 për qind, në Zveçan asnjë votues, ndërsa në Mitrovicë të Veriut, 111 votues, apo 0.59 për qind e votuesve.
Ky proces u organizua teksa Lista Serbe, partia kryesore e serbëve në Kosovë, që gëzon mbështetjen e Beogradit zyrtar, ka bërë thirrje për bojkotim të votimeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.