Deputeti i Bundestagut gjerman, Tobias Gottardt, i cili ndodhet për një vizitë në Tiranë, ka vlerësuar hapat e bëra nga Shqipëria në reformën në drejtësi.
Pas takimit me anëtarët e Komisionit të Jashtëm në kuadër të forcimit të marrëdhënieve shqiptaro-gjermane, ai ka bërë një koment indirekt edhe për opozitën në lidhje me situatën politike në vend.
"Progresi për hapat që janë ndërmarrë është vërtetë i dukshëm. Nuk besoj se më takon mua si i huaj që të vij në Shqipëri që të jap komente mbi situatën politike që ju e njihni më mirë. Si një europian i bindur jam këtu për të mbështetur çdo hap të Shqipërisë në anëtarësimin në BE. Ata që duan demokracinë janë pro dialogut, - u shpreh Gottardt.- Pavarësisht vendit nga i cili vijmë, mesazhi i përbashkët është: Të gjitha vështirësitë dhe risqet që na shfaqen duhet të bashkëpunojmë bashkë”, tha Gottardt duke iu referuar situatës aktuale në Shqipëri dhe vendimin e opozitës për të djegur mandatet.
Ndërkohë që gjatë kësaj konference kryetarja e Komisionit të Jashtëm, Mimi Kodheli ka shprehur keqardhje për vendimin e opozitës për djegien e mandateve.
“Rezultatet kanë ardhur dhe pritet akoma të vijnë. Më vjen keq që vendimi ekstrem e vë në ngërç jetën tonë parlamentare. Jemi këtu të gatshëm t’ia zgjasim dorë opozitës për t’i dhënë po dialogut”, tha Kodheli.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.