Gazeta Si – Nga tani e deri në qershor, kur kuqeiznjtë do të nisin Europianin e tyre të dytë në histori, të gjithë kryqëzojnë gishtat që lojtarët të mos kenë probleme shëndetësore. Dëmtimet janë pjesë e futbollit, që ndonjëherë tregohet i pamëshirshëm.
Mbrëmjen e së hënës një dëmtim pësoi kapiteni i Kombëtares, Berat Gjimshiti, i cili la fushën gjatë ndeshjes me Torinon vetëm pas 19 minutash. Mbrojtësi shqiptar doli nga fusha me dorën te kofsha e majtë, ku ndjente dhimbje.
Sipas shtypit italian, bëhet fjalë për një dëmtim muskulor, por jo serioz, edhe pse priten analizat e detajuara për të mësuar me saktësi shkallën e dëmtimit. Gjimshiti mund të ketë humbur ndeshjen e radhës në kampionat me Atalantën, për momentin nuk ka vend për alarm.
Janë dëmtime që vijnë nga ngarkesa e madhe e ndeshjeve. Gjimshiti është titullar me Atalantën dhe kohët e fundit ka luajtur në kampionat dhe në kupat e Europës. Plus ndeshjet e Kombëtares, ku kapiteni nuk ka munguar.
Për momentin te Kombëtarja shqiptare janë dy lojtarë shumë të rëndësishëm që kanë kaluar dëmtime të rënda, që i kanë lënë jashtë fushave për një kohë të gjatë. Armando Broja dhe Marash Kumbulla. I pari ka filluar të luajë me Çelsin, kurse i dyti ka nisur stërvitjen me grupin te Roma. Deri në qershor trajneri Silvinjo shpreson shumë që të mos ketë asnjë dëmtim të tillë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.