.png)
Një në 20 pacientë vuan dëme të shmangshme nga mjekimi i pakujdesshëm apo praktika të pasigurta. Në nivel global, gjysma e dëmeve që konsiderohen të parandalueshme në kujdesin mjekësor lidhen medikamentet, një e katërta e të cilave klasifikohen si tepër të rënda ose kërcënuese për jetën.
Të dhënat janë bërë publike nga OBSH ku theksohet se barra e rëndë që po vjen nga ilaçet e gabuara apo mjekimi i pakujdesshëm është rritur ndjeshëm pas pandemisë.
Të moshuarit janë një nga grupet më të rrezikuara nga dëmet e ilaçeve, sidomos ata që marrin shumë medikamente njëherësh.
Një studim i bërë në vitin 2021 tregoi se një në çdo tre të anketuar pranoi se ishte vetë-mjekuar për të parandaluar Covid-19. Kjo sipas ekspertëve është e patolerushme, sepse praktika të tilla kanë çuar shpesh në pasoja të rrezikshme për jetën si rezultat i ndërveprimeve të medikamenteve dhe administrimit të gabuar të dozës apo zgjedhjes së trajtimit.
OBSH konstaton shkallë të lartë të dëmtimit të pacientëve edhe në sallat kirurgjikale që lidhen kryesisht me mjekimin gjatë një ndërhyrjeje, gjatë qëndrimit në reanimacion apo kur pacienti paraqitet në urgjencë.
Medikamentet janë mjete të fuqishme për mbrojtjen e shëndetit, po nëse përshkruhen dhe merren gabimisht ose janë jocilësore, mund të shkaktojnë dëme serioze si paaftësi apo humbje jete.
Kostoja globale e lidhur me gabimet në mjekim është vlerësuar në 42 miliardë dollarë në vit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
