.png)
Barazimi ndaj Torinos eklipsoi edhe shpresat e fundit të Milanit se mund të rikthehej sezonin e ardhshëm në Champions League, e tani, kuqezinjtë duhet të shikojnë pas krahëve për të mos humbur edhe objektivin minimal, që është Europa League.
Milionat e shpenzuara nga aksionerët kinezë nuk dhanë rezultatet e pritshme, ndaj formacioni i Gattusos është i thirrur “nën armë”, për të mbrojtur vendin e 6 nga sulmet e Atalantës, Fiorentinës e Sampdorias.
Dy janë biletat në garat kontinentale për 4 pretendentë. Trajneri i Milanit, i shqetësuar së fundmi nga dëmtimet e Bonuccit, Biglias e Calhanoglusë do të luajë mundësitë për Europa Leaguen në betejat e drejtpërdrejta me bergamaskët dhe toskanët, në dy javët e fundit.
Gjithsesi mbeten 15 pikë në lojë për të ravijëzuar renditjen e Serie A, në një luftë që mbetet e hapur deri në fund. Tre do të jenë ekipet italiane që do të kualifikohen për kupën më të vogël kontinentale, vendi i 5 dhe i 6 në kampionat, si dhe fituesi i Kupës së Italisë. Në rast fitoreje nga Juvja, në Europë shkon dhe e shtata e renditur në Serie A.
Milani ka kështu dy mundësi për të mos dështuar në takimin me Europa Leaguen: Të fitojë trofeun e Kupës ndaj Juventusit, ose të jetë brenda pikëvarazhit në Serie A.
Me kalendarin e afërt, Milani mund të hipotekojë kualifikimin duke fituar 3 garat ndaj Beneventos, Bolognas dhe Veronës. Por, lufta për titullin, Championsin dhe Europa Leaguen do të kryqëzohen kaq shumë në këtë fundsezoni, duke e bërë çdo parashikim të pavlefshëm.
Një detaj i vogël, por jo pak domethënës, është publikimi nga klubi kuqezi në faqet zyrtare të rrjeteve sociale i datave të miqësoreve në kuadrin e turneve verorë ndaj Manchester United, Tottenhamit dhe Barcelonës, gjë që të bën të dyshosh se kuqezinjtë tashmë, pa Champions nuk duan as Europa League.
Si.
Solving the problem of falsified medications
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
