.png)
Gazeta Si – Është dita e së vërtetës në Champions për Milanin, por edhe për Lacion e Elseid Hysajt. Kuqezinjtë presin sot Borusia Dortmund në atë që është si një finale, sepse në ‘San Siro’ vetëm 3 pikët vlejnë për të shpresuar për kualifikimin në 1/8-t pastaj në ndeshjen e fundit.
Pa Rafael Leaon, skuadra e Piolit duhet të mundë me çdo kusht Borusian kryesuese, që ta lërë të hapur kualifikimin në sfidën e fundit të grupit ndaj Njukastëllit. Të gjitha skuadrat e grupit kanë shanse matematikore për të kaluar më tej dhe gjithçka varet nga kombinimet e rezultateve, por Milani ka nevojë patjetër të fitojë sot në mbrëmje.
Milani ka 5 pikë, vetëm një fitore, atë ndaj PSG-së, që e rifuti në lojë, ndaj dhe rruga drejt kualifikimit është vërtet e komplikuar. Një pjesë e mirë e saj vendoset sot në ‘San Siro’.
Më e qetë situata te Lacio e Hysajt, që mban vendin e dytë në grupin e vet, por vjen nga një krizë rezultatesh në kampionat dhe duhet të reagojë. Synimi është që të mposhtë Selltikun, duke shpresuar që Atletiko Madrid të fitojë në Roterdam ndaj Fejnordit. Në këtë rast Lacio do të kualifikohej një ndeshje para kohe.
Champions, ndeshjet e parafundit në grupe
Sot, ora 18:45
Lacio-Selltik
Shakhtar-Antverp
Ora 21:00
Milan-B.Dortmund
Barcelona-Porto
Fejnord-Atletiko Madrid
Mançester Siti-Lajpcig
PSG-Njukastëll
Jang Bojs-Crvena Zvezda
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
