.png)
As Çalhanoglu nuk ka rinovuar me Milanin. Turku largohet me parametra zero nga kuqezinjtë dhe kalon tek Interi rival, me të cilin kanë mbetur për t’u vendosur vetëm detajet e fundit. Konfirmimin e ka dhënë vetë mesfushori për “Trt Sport”: "Kam arritur një akord me Interin, nesër do të shkoj në Milano për të firmosur kontratën".
Për të martën janë parashikuar vizitat mjekësore dhe më pas zyrtarizimi i Çalhanglu tek Interi. Turku do të përfitojë 5 milionë euro neto në sezon, plus 1 bonus, për tri vitet e ardhshme. Ashtu si dhe për Donarumën, Milani nuk ka marrë pjesë në ankand. Për Maldinin dhe Masarën, 4 milionë eurot e ofruara në vit, në raport me 2.5 milionë që lojtari fitonte deri tani, ishin të mjaftueshme. Milani ka gati zëvendësuesin ndërkohë, Matia Zakanjin.
Blerjen e Çalhanglu e ka “bekuar” edhe trajneri Simone Inzagi, i cili, duke ditur profilin e lojtarit, mund ta përdorë siç bënte me Luis Alberton te Lacio. Një goditje e mirë me parametra zero në merkato e Interit, që pret të kuptojë se çfarë do të ndodhë me danezin Eriksen.
Milani ka humbur edhe portierin Donaruma, i cili nuk preferoi të rinovonte, por zgjodhi PSG-në. Sot portieri i Italisë ka përfituar nga dita e pushimit që trajneri Mançini i ka dhënë skuadrës dhe ka kryer vizitat mjekësore me ekipin francez, para se të firmosë kontratën 5-vjeçare. Gjatë ndeshjes me Uellsin, në momentin e ndërrimit me Sirigun, Donaruma u vërshëllye, me siguri nga ndonjë tifoz i Milanit, që nuk e ka pëlqyer largimin e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
