.png)
Nga Gazeta ‘SI’ - Guvernatori i Bankës së Shqipërisë Gent Sejko ka komentuar sot përballë komisionit të Ekonomisë (online), projektbuxhetin e vitit 2024, ku ka theksuar përsëri nevojën e sinkronizimit të politikave fiskale me ato monetare.
Në fjalën e tij, Sejko përmendi shpesh ‘shqetësimin’ e tij për konsolidimin fiskal nga ana e qeverisë dhe uljen e informalitetit.
Lidhur me pritshmëritë e qeverisë për të rritur të ardhurat gjatë vitit të ardhshëm, BSH kritikoi qeverinë për nivelin e ulët të arkëtimit të të ardhurave, 25% e PBB-së.
LEXO EDHE:
- Buxheti 2024, Muço: Rritja e pagave nuk nxit zhvillim ekonomik. Taksat në sektorin turistik do ta dëmtojnë
- Gjokutaj: Buxheti 2024 s'ka emër. Nuk i dedikohet një skeme!
“BSH tërheq vëmendjen se niveli i arkëtimit të të ardhurave është më e ulëta në rajon, sa 25% e PBB-së, ndërsa rajoni e ka 36%. Qeveria duhet të ketë një strategji që të bazohet në rritjen e grumbullimit të të ardhurave. Ne mendojmë që të ardhurat e parashikuara mund të arrihen, por duhet të ketë dhe një ulje të informalitetit”, tha Guvernatori.
Më tej, ai shtoi se qeveria duhet të rishikojë përjashtimet tatimore që përfshijnë shtresa të ndryshme apo bizneset, pasi është një politikë që ka kosto të lartë në financat e shtetit. Për këtë sugjeron ai, duhet një analizë e thelluar.
Duke folur për efektivitetin dhe fleksibilitetin e financave publike, kreu i BSH tha se për të duhet një strategji.
“Duhet të përmbushen dy strategji nga financat publike; zhvillimin afatgjatë dhe aftësinë për të reaguar gjatë ngjarjeve të papritura. Plani i investimeve (shpenzimet kapitale) duhet të jenë të njëtrajtshme gjatë vitit, në mënyrë që të mos krijojnë luhatje në tregjet financiare dhe të jenë efektive”, propozoi Sejko.
Pensionet dhe PPP-të ishin dy shqetësimet e tjera të BSH-së që Sejko i dha zë. Ai i kërkoi qeverisë reformimin e të gjithë skemës së pensioneve.
“Shqetësim është deficiti i skemës së sigurimeve, shëndetësore dhe shoqërore. Janë një gropë për buxhetin e shtetit. Arrin në 3.6% të PBB-së, ndërkohë që vendi po përballet me një sfidë serioze nga ndryshimet demografike (plakja) dhe lëvizja e lirë (emigrimi). Rishikoni kuadrin ligjor dhe shtoni përpjekjet për të zhvilluar pensionet private”, u shpreh Guvernatori i Bankës Qendrore.
Duke i cilësuar kontratat PPP, si rrezik potencial për financat e shtetit, Sejko sugjeroi që të vendosen tavane ligjore afatgjate për këto projekte, jo vetëm vjetor. Po ashtu, ai sugjeroi një kualifikim më të lartë të punonjësve që merren me këto procese.
Pyetur nga drejtuesi i komisionit, Eduart Shalsi për deeuroizimin, Guvernatori tregoi se në bashkëpunim me ministrinë e Financave, paketa do të pësojë disa ndryshime brenda këtij viti.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
