.png)
Me gjithë performancën pozitive të ekonomisë, siç përshkruhet nga qeveria dhe BSH, Këshilli Mbikqyrës, ndryshe nga ç’deklaroi guvernatori Gent Sejko në funddhjetor 2018-të se do të rriste normën bazë të interesit, e ka lënë atë të pëndryshuar në nivelin 1%.
Në konferencën rutinë për shtyp pas Mbledhjes së Këshillit Mbikqyrës, sot guvernatori Sejko është shprehur se “në raport me parashikimet e kaluara, kthimi i ekonomisë në ekuilibër dhe i inflacionit në objektiv janë shtyrë lehtë në kohë. Ky rishikim është ndikuar më së shumti nga parashikimet më pesimiste për ekonominë e huaj. Po ashtu, ai reflekton nevojën për thithjen e plotë të goditjeve të ofertës në inflacion dhe shuarjen e plotë të efekteve frenuese që vijnë nga kursi i këmbimit.”
Nisur nga këto konsiderata, tha Sejko, Këshilli Mbikëqyrës vlerëson se politika monetare do të vijojë të mbetet stimuluese edhe gjatë horizontit afatmesëm dhe vendosi: të mbajë të pandryshuar normën bazë të interesit në nivelin aktual prej 1.00%; dhe, të mbajë të pandryshuara normat e interesit të depozitës dhe të kredisë njëditore, përkatësisht në nivelet 0.1% dhe 1.9%.
Gjithashtu, duke gjykuar mbi skenarin bazë dhe balancën e rreziqeve, guvernatori bëri me dije se Këshilli Mbikëqyrës vlerëson se normalizimi i politikës monetare do të jetë mjaft i kujdesshëm. “Në çdo rast, intensiteti i stimulit do të përshtatet me shpejtësinë dhe qëndrueshmërinë e përmirësimit të aktivitetit ekonomik, ndërkohë që Banka e Shqipërisë mbetet e gatshme të reagojë ndaj goditjeve të mundshme.”- tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
