.png)
Nga Gazeta ‘SI’ - Normat e interesit për kreditë dhe depozitat në lekë po përçojnë ende efektin e politikës monetare. Banka e Shqipërisë raporton se në tre muajt e parë 2023, norma e interesit për kredi në lekë për biznesin u rrit në 7.3%, nga në tremujori i mëparshëm që ishte 7%. Por kjo ka ndodhur për kreditë e mëdha. Interesat e kredive të vogla për biznese, të cilët reaguan më shpejt vitin që shkoi, janë përmbajtur disi këtë tremujor.
Në kreditë për individ, rritja e normës ka shfaqur tendenca rënëse, nga 8% në 7.6% nga tremujori i fundit 2022 në atë të parin 2023. Rënia e normave të interesit ka qenë e pranishme si në kredinë konsumatore, ashtu edhe në kredinë hipotekore. Në të dy këto segmente kanë mbizotëruar kredi me norma interesi fikse, të ofruara me kushte preferenciale për një apo dy vitet e parë. Gjithashtu, BSH thekso se normat në kreditë për individë kanë reflektuar edhe dinamikën e yield-eve të titujve, ndonëse pa transmetuar luhatshmërinë e theksuar që këta të fundit shfaqën në pjesën e dytë të vitit të kaluar dhe në tremujorin e parë të këtij viti. Përtej luhatjeve afatshkurtra, trajektorja e normave të interesit për individët mbetet rritëse.
Interesat e kredisë së re në euro vijojnë të rriten më ngadalë krahasuar me interesat e kredive në lekë. Interesi mesatar për kreditë dhënë bizneseve shënoi 5.4% në tremujorin e parë, duke regjistruar rritje margjinale krahasuar me tremujorin e mëparshëm. Tek individët, interesi i kredisë në euro për blerje banese rezultoi 3.6%, duke qëndruar pranë mesatares prej 3.4% të dy viteve paraardhëse.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
