Në orën 6 të mëngjesit gjykata e krimeve të rënda u rrethua nga policia. Forca të ndërhyrjes së shpejtë, Renea, agjentë krimesh dhe drejtues të policisë së bashku me drejtorin e përgjithshëm Ardi Veliu, qëndruan në gjendje gatishmërie në të gjithë perimetrin e godinës, derisa seanca u mbyll.
Për arsye të paqarta ishte i pranishëm edhe një nga snajperistët e forcave Renea.
Në proces u paraqitën katër prokurorët që mbajnë edhe pozicione drejtuese tek krimet e rënda, Donika Prela, Gentian Osmani, Anton Martini dhe Besnik Muçi.
Por seanca dështoi sërish dhe akuza nuk e shpalli dot seancën , shkak u bënë problemet shëndetësore të të pandehurve, çka hedh dyshime se përfundimisht gjyqi Shullazi ka hyrë në rrugë pa krye dhe se tashmë loja do zhvillohet nga të pandehurit.
Po çfarë ndodhi në gjykatë këtë të martë?
Gazeta Si zbardh procesverbalin e seancës gjyqësore
Gjykata : nisim procesin ndaj të pandehurve Emiliano Shullazi e të tjerë. Të pranishëm prokurorët
Prokurorja Donika Prela : më datë 21 shtator , ka një vendim të marrë nga unë, ku unë kam caktuar për këtë çështje prokurorët Donika Prela, Anton Martini, Gentian Osmani dhe Besnik Muçi
Gjykata : na sill shkresën ( prokuroria e dorëzon)
Gjykata : vijojmë me mbrojtësit. I pandehuri Emiliano Shullazi nuk është paraqitur. Ai ka dorëzuar një deklaratë me shkrim në të cilën shpreh mungesën dhe konfirmon vijimin e mbrojtjes nga avokati i tij Vladimir Meçi dhe Ravik Gurra
I pandehuri Gilmando Dani ka paraqitur gjithashtu deklaratë , dhe pohon mungesën dhe mbrojtjen nga avokati i tij Denion Bogdani
I pandehuri Endrit Qyqa ka paraqitur deklaratë ku shpreh mungesën për shkaqe shëndetësore. Ai refuzon që në këtë seancë të përfaqësohet nga avokati i tij Vladimir Meçe
I pandehuri Blerim Shullazi ka dërguar deklaratë , në të cilën thotë se mungon për shkaqe shëndetësore. Ai thotë se kërkon të jetë vetë i pranishëm dhe mos të përfaqësohet vetëm nga avokati i tij Aldo Tabaku. Ndërkohë ka sjellë një shkresë edhe mjeku i paraburgimit i cili thotë se i pandehuri Blerim Shullazi refuzon të mjekohet.
Nga ana tjetër avokati i tij Aldi Tabaku ka dorëzuar pak minuta më parë një kërkesë ku shpreh mungesën , sepse sipas tij duhet te shkojë në spital për një familjar të tij, sepse familjari i tij është në gjendje të rëndë.
Prokurori Anton Martini: ne kemi informacion se avokati i Blerim Shullazit ishte në ambjentet e gjykatës. Nëse është kështu ..
Avokat Ravik Gurra- prokuror, këto informacionet "nëna jote i tha nënës tënde ", nuk kanë asnjë kuptim. Lëri këto prokuror. Mbi të gjitha duhet të jemi humanë
Avokat Denion Bogdani: dhe kujdes zoti prokuror, mos ngatërroni Kodin e Procedurës Penale , se mos kërkoni të deklarojë mungesën
Avokat Vladimir Meçe: me lejen tuaj e nderuar gjykatë. Më lejoni të them diçka. Shkak i mungesës së avokatit Aldo Tabaku është sëmundja e të atit, ai vuan nga tumori dhe kolegut ju tha se sot i kanë ndërprerë kimioterapinë. Ajo çfarë kërkojmë ne është humanizëm mbi gjithçka. Eshtë e vërtetë , ai ishte këtu, dhe iku 15 minuta përpara se të niste procesi, dhe shkakun e thashë më sipër
Avokat Ravik Gurra: dhe jeni të lutur gjithashtu të keni kujdes kur flasim për shtyrje. Dhe mos bëni shkaktarë avokatët. Ky është një rast fatkeq
Prokuror Anton Martini: për Blerim Shullazin dhe Endri Qyqe (një moment ngatërron mbiemrin dhe thotë Cyrbja), që deklarojnë mungesën për arsye shëndetësore, kërkoj pezullimin e afateve të paraburgimit. Për avokatin Aldo Tabako, kërkojmë të njoftohet dhoma e avokatisë sepse mendojmë se ka shkaqe të paarsyeshme. Prokuroria deklaron në këtë moment se e ka përgatitur pretencën. Duke qenë se bëhet shkak mungesa e avokatëve , kërkojmë pezullimin e afateve të paraburgimit
Gjykata - vendim , në këto kushte gjykata shtyn seancën. Për të pandehurin Endri Qyqe, të njoftohet avokatja kryesisht Eralda Brahimasi, e cila do të zëvendësojë avokatin Vladimir Meçe. Gjykata vendos të caktojë mbrojtës kryesisht edhe për Gilmando Danin. Ajo do të jetë Aida Metushi, e cila të njoftohet. Pezullohen afatet e parabugimit. Gjykata vendos të shtyjë seancën për në datën 2 tetor. Zotërinj prokurorë , besoj jeni në dijeni se ky proces zhvillohet çdo të martë në orën 9, e për këtë data do jetë 2 tetor ditë e martë. Ditën e mirë
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.