Nga Gazeta ‘SI’- Borxhi i jashtëm bruto i Shqipërisë, (BJB)për tremujorin e tretë 2022, arriti në vlerën e 9.9 mld eurove. Në raport vjetor rritja llogaritet pothuajse 10%, dhe në tremujorë 0.3%.
Rritje ka pësuar borxhi i jashtëm i bankave tregtare, i bankës qendrore dhe i sektorëve të tjerë, ndërsa ai i qeverisë ka pësuar rënie krahasuar me tremujorin e mëparshëm, sipas shifrave të publikuara nga Banka e Shqipërisë.
Kjo është vlera më e lartë e borxhit të jashtëm bruto që kur BSH ka nisur publikimin në 2008-n.
Paralelisht me BJB-në, Banka ka publikuar dhe shifrat e investimeve të huaja direkte (IHD) në vend, që vijuan rritjen edhe në tremujorin e tretë të vitit, duke kapur vlerën e 344 mln eurove. Në raport vjetor, rritja është 32%, ndërsa në raport tremujorësh, me 2%.
Sipas Bankës së Shqipërisë, fusha me më shumë IHD ishte ajo e hidrokarbureve, aktiviteteve financiare dhe energjia, sektorëve që duken tërheqëse për investime për situatën ku ndodhen vendet europiane tani.
Më herët gjatë muajit, Guvernatori i Bankës së Shqipërisë, Genti Sejko tha se rritja e IHD-ve në vend bashkë me turizmin, kanë rritur qarkullimin e euros në tregun shqiptar dhe kanë mbiçmuar lekun, duke kontrolluar dhe inflacionin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.