Këtë të premte, vendi ynë është përfshirë nga reshje dëbore në shumë zona, kryesisht qytetet juglindore dhe verilindore të vendit janë zgjuar nga petku i bardhë i dëborës.
Në qytetin juglindor të Korçës, trashësia e dëborës ka arritur deri në 5-10 cm në qytet dhe në zonat malore deri 15-20 cm. Nga sa raportohet nuk ka problem në qarkullim në akset kryesore. Kompanitë e mirëmbajtjes po vijojnë punën për mirëmëbajtjen e rrugëve.
Ndërkohë, në aksin kryesor Qafë Thanë-Kapshticë kalueshmëria është normale, por rekomandohet me zinxhir. Janë hapur akset rrugore Libonik-Sheqeras-Orman-Rembec-Pojan-Zvezde-Golloberdë-Potgorie-qyteti Maliqit. Për në fshatin e Dardhës qarkullimi është i detyrueshëm me zinxhirë dhe i vështirë për shkak të akullit në rrugë.
Mësohet se kanë pasur problem me energjinë në Sheqeras, Sovjan e zonën e Gorës.
Ndërkohë, bora dhe ngricat kanë “pushtuar” edhe Dibrën.
Po ashtu edhe Pogradeci ofron një pamje fantastike në këtë ditë të ftohtë janari.
Ndërkohë është mbuluar nga dëbora edhe Stebleva e Librazhdit.
ARRSH në njoftimin e saj për mediat thotë se kontraktorët kanë “bërë shpërndarjen e kripës dhe pastrimin e të gjitha akseve, si në: Dedaj-Razëm-Bogë, Qafë Mali-Fierzë, Kuben Vasije, Tammare-Shkodër, Burrel-Klos-Peshkopi, Kukë-Has, Përrenjas-Kapshticë, ku qarkullimi vazhdon normalisht”.
Nga ana tjetër mësohet se në akset Korçë-Qafë Qarri, Korçë-Dardhë, në pjesën fundore të aksit Krujë-Sarisalltik me gjatësi prej 2 km rekomandohen goma dimërore dhe përdoruesit e mjeteve të pajisen me zinxhirë gjatë natës dhe në orët e para të mëngjesit për shkak të ngricave. Vazhdon puna me mjete borë pastruese.
Ndërsa në akset e Dajtit, Qafë Priskë-Qafë Mollë rekomandohet kalimi me zinxhirë, pasi ka prezencë të ngricave në disa vende.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
