Bojkoti vazhdon, Liga Profesioniste pret qeverinë deri ditën e enjte

Ditën e premte mund të ketë një vendim zyrtar në lidhje me bojkotin e Superiores. Presidenti i FSHF-së, Armand Duka, deklaroi se kishte marrë garanci nga kryeministri Rama për zgjidhjen e kërkesave dhe se kampionati do të nisë shpejt. Megjithatë, ai pohoi se i takon Ligës Profesioniste të vendosë.

Pas përfundimit të takimit të sotëm, presidenti i saj, Edvin Libohova është shprehur se ende nuk është marrë një vendim për kampionatin. Ai u shpreh se i do të presin qeverinë deri ditën e enjte për një përgjigje përfundimtare për realizimin e kërkesave dhe më pas ditën e premte do të ketë tjetër mbledhje të Ligës.

“Ne do të presim deri ditën e enjte nëse do të kemi një përgjigje nga qeveria. Më pas do mblidhemi për të vendosur për bojkotin. Po i lëmë një afat tjetër, për të pasur një përgjigje dhe më pas do mblidhemi për të marrë vendimin përfundimtar. Nuk e dimë pse ende nuk ka ardhur një përgjigje përfundimtar. Nuk ka një ngërç. Nëse nuk vjen deri ditën e enjte, do mblidhte Liga ditën e premte dhe më pas do vendosim. Nuk kemi detaje se çfarë diskutoi Duka me Ramën, ishte pozitiv, por nuk kemi detaje. Ky bojkot nuk e rrezikon kampionatin. Nuk është diskutuar asnjë propozim tjetër për kampionatin.”, u shpreh Libohova.