Bojkoti/ Liga i përgjigjet Fidel Yllit: Prisnim më shumë mbështetje

Vazhdojnë replikat në distancë sa i takon bojkotit të kampionatit kombëtar të futbollit dhe kërkesave të Ligës Profesionste ndaj qeverisë. Kryeministri Rama ka ngarkuar deputetin Fidel Ylli të negociojë me Ligën dhe ai doli dje në një konferencë shtypi, ku veç ta tjerash theksoi se gjithçka bëhet nga FSHF-ja dhe presidenti i saj, Armand Duka. Po ashtu, Ylli i bëri thirrje Ligës për t’u ulur në bisedime. Sot ka ardhur edhe reagimi i sekretarit të Ligës Profesionise, Dritan Kadia, i cili i është drejtuar deputetit Ylli me këto fjalë:

I dashur zoti Fidel!
E ndoqa me vëmendje konferencën e shtypit që ju dhe Ministria e Financave, zonja Denaj dhatë dje për mediat. T’ju them të drejtën, prisja një qëndrim më mbështetës për kërkesat e Ligës, të cilat në fakt janë premtime të drejtpërdrejta e të bëra fjalë për fjalë, nga Kryeministri përpara 18 muajsh.

Sigurisht që është e drejta juaj të bëni politikë me gjithçka, por komuniteti i futbollit nuk ndihet i nderuar nga kjo prirje. Konferenca e djeshme e shtypit nuk i dha përgjigje disa pyetjeve:
1) Pse nuk i përmbushni, derisa i konsideroni të drejta kërkesat e Ligës?
2) A janë prej kohësh të njohura për qeverinë kërkesat e Ligës?
3) Përse Ministria e Financave do të bisedojë me ne, kur ajo dhe qeveria, siç deklaroi edhe dje, janë kundër kërkesave të Ligës?
4) Pse qeveria bën një të ashtuquajtur ligj për sponsorizimet që nuk e ka asnjë vend europian e ballkanik? Pse nuk miraton një ligj si Maqedonia, Kosova, Hungaria, Gjermania etj etj, “Ligjin për sponsorizimin”, që propozon Liga?

Unë, si Sekretar i Ligës, mbetem ne dispozicionin tuaj për çdo informacion që ju kërkoni. E përsëris edhe një herë ftesën në adresën tuaj, të vini për një takim në selinë e Ligës. Gjithashtu, ju lutem t’i përcillni Kryeministrit si i vetmi person që mund të krijojë një vullnet politik të shumicës për zgjidhjen e katër kërkesave, gatishmërinë e përfaqësuesve të tryezës së presidentëve për t’u takuar e biseduar me të.
Me respekt, Sekretari i Përgjithshëm i Ligës Profesioniste, Dritan Kadia.
Tiranë, më 16 shtator 2020

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.