Përfundojnë pushimet për Zvonimir Boban. Kroati kthehet në botën e futbollit dhe e bën këtë gjë nga dera kryesore. Javën e ardhshme do të zyrtarizohet detyra që UEFA i ka propozuar: “Chief of Football”, një rol operativ pranë presidentit Aleksander Ceferin.
Lajmi i publikuar së pari nga “La Repubblica” është konfirmuar dhe kështu Boban do të lërë pas krahëve aventurën si drejtues i Milanit. Kujtojmë që Gjykata e shkallës së parë ka vendosur në favor të tij për një dëmshpërblim nga klubi kuqezi, për shkak të shkarkimit në pranverën e 2020-ës. Boban kthehet të japë kontributin e tij në botën e futbollit, me të cilën është mjaft i lidhur.
Edhe më parë kroati ka pasur një detyrë prestigjioze në politikën e futbollit, duke qenë krahu i djathtë i Xhani Infantinos në FIFA. Si zëvendëssekretar, ai ka qenë një nga mbështetësit kryesorë të futjes së VAR-it në futboll.
Dhe pikërisht video-asistenca arbitrale do të jetë pjesë e detyrave që do t’i besohen ish-mesfushorit nga Ceferin. Boban do të kujdeset gjithashtu për raportet mes ligave dhe klubeve, duke parë kalendarët për të harmonizuar sa më mirë të jetë e mundur impenjimet e kampionateve me ato të kupave. Shefi i sektorit të futbollit ishte një pozicion i pambuluar aktualisht në Nion dhe tani e tutje do të mendojë Zvonimir Boban.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.