Bitcoin pret ndryshime të mëdha teknike, gati për një tjetër rritje të fortë

Bitcoin është një vit larg një eventi teknik - i cili mund të jetë katalizatori për rritjen e zgjatur të vlerës së kriptomonedhës.

Në prill ose maj 2024, Bitcoin pritet të futet në procesin e quajtur “halving” (përgjysmimi), edhe pse data fikse nuk dihet.

Bitcoin ka vazhduar rritjen gjatë javëve të shkuara në pritje të përgjysmimit, pasi një ulje e mundshme e normës së interesit të Rezervës Federale të SHBA-së përballet me perspektivën e rritjes së ngadaltë ekonomike dhe shtrëngimit të kushteve të kredisë si rezultat i problemeve në sektorin bankar.

Një Bitcoin tregtohet pothuajse 30.000 dollarë, sipas CoinGecko. Kriptomonedha më e madhe në botë është rritur me më shumë se 80% që nga fillimi i vitit.

Vijay Ayyar, zv.president i platformës së kriptomonedhave Luno, tha se Bitcoin është ngjitur mbi 30.000 dollarë në një kohë kur bankat janë në krizë.

Çfarë është përgjysmimi i Bitcoin?

Përgjysmimi i Bitcoin ndodh afërsisht çdo katër vjet, ose sa herë që shtohen 210.000 "blloqe" të tjera në blockchain. Ngjarja shkurton shpërblimet për minatorët e Bitcoin me 50% (ata marrin monedha sa herë vërtetojnë transaksionet). Qëllimi është të zvogëlohet numri i njësive të reja Bitcoin të lëshuara në treg. Momentalisht prodhuesit e Bitcoin marrin 6.25 Bitcoin për çdo bllok që minojnë me sukses. Kjo do të thotë se kompjuteri i tyre kishte sasinë e duhur të fuqisë kompjuterike të nevojshme për të zgjidhur enigmat kriptografike që sigurojnë rrjetin e bitcoin dhe parandalojnë rrezikimin e tij nga aktorë keqdashës.

Pasi të ndodhë përgjysmimi tjetër i Bitcoin, ky shpërblim do të reduktohet në 3.125 Bitcoin.

Mbështetësit e kriptomonedhës thonë se kjo mund të ndihmojë në rritjen e çmimit duke rritur mungesën e bitcoin.

Numri maksimal i Bitcoin-ve që do të ekzistojnë ndonjëherë në qarkullim është kufizuar në 21 milionë. Kjo sigurohet nga mekanizmi i përgjysmimit, ku shpërblimet për nxjerrjen e Bitcoin përfundimisht do të ulen në 0 dollarë.

Përpara përgjysmimit të fundit, i cili u zhvillua më 11 maj 2020, çmimi i Bitcoin u rrit me 19% në 12 muajt e mëparshëm, nga 7 mijë dollarë në 8,568,88 dollarë, sipas shifrave nga CCData.

Gjatë përgjysmimit para kësaj – që ndodhi më 9 korrik 2016 – Bitcoin u rrit 142% krahasuar me 12 muajt e mëparshëm, duke lëvizur nga 269 dollarë në 651 dollarë.

“Duke analizuar modelet historike të përgjysmimit të Bitcoin, duket se investitorët shpesh akumulojnë Bitcoin në prag të ngjarjes së përgjysmimit, megjithëse koha e saktë dhe shtrirja e kthimeve pas përgjysmimit mund të ndryshojnë”, tha për CNBC Jamie Sly, analist në CryptoCompare.

"Periudha e akumulimit nga fundi i tregut pas shpërthimit deri në datën e përgjysmimit ka kaluar historikisht të paktën 500 ditë."

Sly shtoi: “Kjo do të thoshte, nëse do të supozonim se fundi i tregut për këtë cikël ishte në nëntor të vitit të kaluar (kur Bitcoin arriti një nivel të ulët vjetor prej 15,760 dollarësh), atëherë ne jemi vetëm 142 ditë në ciklin aktual. Kjo do të lidhet me datën e ardhshme të pritshme të përgjysmimit të Bitcoin, e cila është 378 ditë të tjera përpara.”

Fitimet pas përgjysmimit të Bitcoin

Çmimi i Bitcoin tenton të rritet edhe më i lartë, në muajt që pasojnë përgjysmimin.

Pas përgjysmimit të 11 majit 2020, kriptomonedha u rrit me 688.31% në 546 ditët në vijim, duke arritur një rekord prej 67,549,14 dollarë më 8 nëntor 2021, sipas CCData.

Bitcoin pati një 2022 të zjarrtë, të përcaktuar nga kolapset e kompanive dhe projekteve të mëdha, nga stabilcoin terraUSD tek shkëmbimi i kriptove FTX.

Rritja e inflacionit çoi në norma më të larta interesi në SHBA dhe në ekonomitë e tjera të mëdha, gjë që bëri që investitorët të largoheshin nga Bitcoin dhe asete të tjera të rrezikshme.

Kjo ka parë që çmimet e disa valutave digjitale kryesore të bien ndjeshëm nga nivelet e tyre më të larta të të gjitha kohërave.

Pavarësisht rritjes së tij të fundit në 30,000 dollarë, Bitcoin është ende në rënie më shumë se 50% nga nivelet më të larta të nëntorit 2021.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.