.png)
Kriptomonedhat vazhduan zhvlerësimin gjatë të premtes me investitorët që po llogarisin problemet më të fundit financiare në Silvergate Capital dhe vlerësuan se çfarë mund të nënkuptojë një falimentim i mundshëm në bankën e kriptove për të gjithë industrinë.
Bitcoin ra me 4%, në 22 mijë dollarë dhe Ether me 5% në 1.5 mijë dollarë.
Rënia erdhi natën e së enjtes vonë, disa orë pasi disa kompani kriptosh thanë se kishin ndaluar pranimin ose fillimin e pagesave drejt ose nga Silvergate – duke përfshirë Coinbase, Galaxy Digital, Circle, Paxos dhe Bitstamp. Silvergate, e cila është bërë banka kryesore për bizneset e kriptomonedhave, njoftoi të mërkurën se nuk do të paraqisë në kohë raportin e saj vjetor dhe paralajmëroi se mund të mos jetë në gjendje të operojë për 12 muaj të tjerë.
"Kthesa e rënies sigurisht që mund të jetë një reagim i vonuar ndaj çështjeve të vazhdueshme të Silvergate," - tha Clara Medalie drejtoresha e kërkimit në Kaiko. “Shumë shkëmbime të mëdha dhe me rëndësi në treg janë partnerë me Silvergate për transaksione të shpejta midis subjekteve dhe çdo ndalim mund të ketë ndikim në likuiditetin global të kriptove.”
Çmimet e Bitcoin dhe Ether mbetën të ulëta gjatë të enjtes, ndërsa aksionet e Silvergate ranë 57%. “Në nisje të vitit 2023, tregjet e kriptove shijuan një rritje solide në nivelet më të larta gjashtëmujore pas një ngadalësimi të shkaktuar nga falimentimi i FTX, por lajmet e Silvergate kanë rikthyer shqetësimet rreth likuiditetit dhe rrezikut,”- shtoi Medalie.
Bitcoin është rikuperuar këtë vit pasi ra me më shumë se 60% në 2022 në nën 17.000 dollarë në mes të tërheqjes së aktiveve të rrezikut dhe shpërthimit të FTX, e cila ishte një klient Silvergate. Edhe pas rënies së fundit, Bitcoin është rritur më shumë se 30% këtë vit./CNBC
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
