.png)
Në një krizë energjetike që mban peng Europën dhe siç u lajmërua edhe në Shqipëri, zgjidhja mund të jetë përsëri në teknologjinë financiare.
Prodhimi i Bitcoin, proces i njohur si mining, kërkon sasi të mëdha energjie që shpeshherë barazohet me konsumin vjetor të shteteve të mëdha, mund të ketë dorë në krizë po aq sa edhe mund të ndihmojë.
Shumë shtete të zhvilluara të cilat i kanë paraprirë krizave të energjisë, hidrokarbureve dhe uljes së nivelit të karbonit në ajër, kanë përshtatur sisteme litiumi ku rezervohet energji për një moment të dytë, siç është kriza.
Djemtë që krijuan kriptomonedhën e parë shqiptare, ALBCoin në një komunikim për Gazetasi.al, (duke refuzuar t’u bëhet identiteti publik), tregojnë se në fakt vendi ynë ka kapacitetin e krijimit të sistemeve të prodhimit të Bitcoin dhe shfrytëzimin në mënyrë eficente.
“Shqipëria nuk mund të ketë bateritë e litiumit që kanë vendet e huaja, por të bëhen pjesë edhe vetë në këtë sistem bashkëpunimi dhe ndërveprimi me Bitcoin për të përfituar një vlerë ekonomike nga elektriciteti i tepërt kur ndodhet pa blerë bateri dhe pajisje tjetër”, thotë përfaqësuesi i ALBC për “SI”.
Pra, ata sugjerojnë ngritjen e qendrave të mining të Bitcoin me kompjuterë nga vetë shteti a kompani private dhe kriptot që prodhohen, vlera e tyre në para, të përdoret për të blerë energjinë në kohën kur mungesa rritet.
“Mund të lindin dyshime se mining i BTC po përdoret në Shqipëri nga individë të njohur me fushën, por jo për përfitimet që përmendëm, por për xhepat e tyre. Mundësia për t’i fshehur është e madhe. Por ne nuk kemi prova”.
Sipas tyre, vjedhja e energjisë elektrike nuk mund të bëhet më sipas mënyrës së vjetër sepse ka vazhdimisht akorde mes shteteve për shit-blerje dhe transaksione parash.
“Sot për të vjedhur energji mjaftojnë disa qendra klandestine të prodhimit të BTC dhe paratë mund të shkojnë kudo anonimisht”.
Që një vit më parë, prodhimi i kriptomonedhave është dhënë si zgjidhje në të mirë të energjisë dhe ruajtjes së saj. Teprica e energjisë elektrike që shkon për konsum mund të përdoren për mining të kriptove dhe njëkohësisht dhe për burim të ardhurash.
Më herët gjatë vitit, burime të Gazetasi.al konfirmuan prezencën e stacioneve të prodhimit të kriptomonedhave në vend, një ndër to u zbulua dhe pas një vrasjeje të kryer në prill në rrugën “5 Maji”, Tiranë.
Vitin e shkuar Shqipëria, ndër vendet e para në Europë miratoi ligjin për kriptomonedhat dhe disa muaj më parë ligji u rregullua duke e bërë të mundur përdorimin e tyre nga individë të licencuar, por duke mos sqaruar nëse prodhimi nga të palicencuar është shkelje.
Shumë herë ka pasur dhe polemika për vetë ligjin, por edhe për tregun e tyre në vendin tonë, duke spekuluar për financim të aktiviteteve kriminale a pastrim parash, njësoj si Presidentja e Bankës Europiane, Christina Lagarde.
ALBcoin është zyrtarisht kriptomonedha e parë e Shqipërisë, e cila sapo mbushi vitin e parë në operim, por qendrat e saj të prodhimit gjenden jashtë vendit. Krijuesit e saj e përcaktojnë këtë si inovacion dhe jo biznes, ndonëse fitimet janë të mëdha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
