.png)
Besnik Cani pretendon se dy anëtarë të Kolegjit të Posaçëm të Apelimit janë emëruar në kundërshtim me ligjin dhe kriteret e përcaktuara prej tij dhe për rrjedhojë kërkon përjashtimin nga trupa gjykuese e vettingut të shkallës së dytë, që po shqyrton ankimimin e Komisionerit Publik ndaj anëtarit të Këshillit të Lartë të Prokurorisë.
“Subjekti e ka humbur besimin tek dy anëtarët dhe kërkon përjashtimin e tyre”, deklaroi avokati Eduard Halimi, që përfaqëson Besnik Canin në këtë proces.
Veç kësaj, Halimi tha se klienti i tij ka dorëzuar në SPAK padi ndaj dy anëtarëve Luan Daci dhe Ardian Hajdari. I pari akuzohet se gjatë marrjes në pyetje nga komisioni i vlerësimit të kandidaturave për në Kolegjin e Posaçëm të Apelimit ka gënjyer duke fshehur në të shkuarën një vendim shkarkimi, ndërsa i dyti akuzohet se ka gënjyer për notën mesatare të studimeve.
Kolegji i dha pjesërisht të drejtë pretendimeve të Besnik Canit, duke vendosur që Luan Daci dhe Ardian Hajdari të vazhdonin të ishin pjesë e trupës prej 5 gjyqtarësh që po shqyrton ankimimin e Këshillit të Lartë të Prokurorisë, por përjashtoheshin nga vendimmarrja.
Komisioneri Publik ka apeluar vendimin e Komisionit të Pavarur të Kualifikimit, që vlerësoi pozitivisht Besnik Canin, duke ngritur pikëpyetje mbi etikën dhe profesionalizmin e anëtarit të Këshillit të Lartë të Prokurorisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
