Lulzim Basha nuk ka pritur 20 qershorin, datë e caktuar nga prokuroria për ta shoqëruar atë me forcë mbi akuzën e pastrimin të parave në lidhje me lobimin e Partisë Demokratike në Shtetet e Bashkuara të Amerikës, por është paraqitur vetë 24 orë më parë.
Por, përse zgjodhi kreu i PD-së të vetëparaqitej në një kohë që më 16 qershor e refuzoi kërkesën e prokurorisë me arsyetimin se organi i akuzës nuk kishte plotësuar kriteret e Kodit të Procedurës Penale në kërkesën e vet? Përgjigjen e dha në përfundim të dëshmisë para prokurorëve.
“Arsyeja pse jam sot këtu para jush është që të shërbejë si shpërqëndrim për ju dhe qytetarët për skandalet që kanë plasur nga Bild. Kjo është arsyeja e vetme pse ndodhem sot para jush. Prokuroria nuk ka asnjë fakt, asnjë provë shtesë që nga 25 maji kur unë isha këtu për herë të fundit. Asnjë fakt të ri, për arsye se kjo akuzë është montuar në zyrën e Edi Ramës për llogari të Edi Ramës. Nuk ka asnjë dokument të falsifikuar në dosje, asnjë transaksion, asnjë rus, asgjë!”, deklaroi kreu i PD-së.
Basha i parapriu 20 qershorin, ku sipas paralajmërimit të prokurorisë do të shoqërohej me forcë për t’u njohur me akuzën dhe marrjen si i pandehur, në dukje si një strategji për të mos hequr vëmendjen nga publikimet e Bild, që më 20 qershor pritet të nxjerrë të tjera përgjime, një ditë para protestës së radhës kombëtare të thirrur nga opozita.
“Është një akuzë e formuluar me qëllim që t’u shpërqëndrojnë ju dhe qytetarët nga skandalet që ka plasur Bild dhe skandalet që do të plasin nesër nga Bild, që tregojnë se ku e ka katandisur Edi Rama Shqipërinë”, deklaroi Basha.
Kreu i PD thotë se prokuroria nuk e kishte dosjen gati për faktin se çështja është e montuar në zyrën e Edi Ramës, që sipas tij, e hedh për konsum sa herë që në radhët e socialistëve plas një skandal, për të hequr vëmendjen e qytetarëve ndaj këtyre skandaleve.
“Dosjen s’e kishin gati sepse nuk kanë dosje. Është një çështje e montuar në zyrën e Edi Ramës. Nuk ka asgjë ndryshe nga 25 marsi. Herën e parë më thirrën kur plasi skandali i Saimir Tahirit, herën e dytë kur plasi skandali i Geron Xhafajt, më thirrën pastaj edhe kur plasi skandali i Rrahman Rrajas dhe taulant ballës, më pas kur plasi skandali i Vangjush Dakos. Tani më thërrasin sërish”, u shpreh Basha.
Një ditë më parë në Prokurorinë e Tiranës dëshmoi ish-Sekretari i Përgjithshëm i demokratëve, Arben Ristani. Ristani deklaroi në përfundim se prokuroria nuk i paraqiti asnjë provë në lidhje me akuzat e ngritura, të cilat i konsideroi plotësisht politike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.