Pavarësisht thirrjeve për dialog të presidentit Ilir Meta për zgjidhjen e krizës politike në vend, kryetari i Partisë Demokratike, Lulzim Basha e ka hedhur poshtë arritjen e kompromisi politik pa u ndëshkuar vjedhësit e votave.
Në një deklaratë për median, kreu i PD-së duke iu referuar 10 përgjimeve të nxjerra nga “Bild” u shpreh se Rama po kërkon ta bëjë qesharak megakrimin zgjedhor dhe se ndëshkimi i vjedhësve të votave është themeli i zgjidhjes politike.
“Reagimi arrogant i Edi Ramës dhe bashkëkriminelëve të tij zgjedhorë, me përpjekjet e tyre për ta normalizuar dhe bërë qesharake, ka për qëllim ta mohojë këtë megakrim me shpresë se shpejt do të harrohet.Dua t’i them atij dhe të gjithë të tjerëve. Asgjë nuk do harrohet. Asgjë nuk do të tolerohet. Çdo krim do të ndëshkohet. Rruga drejt normaliteti politik dhe shoqëror në Shqipëri kalon nga nxjerrja e të gjithë përgjegjësve para drejtësisë. Asnjë hap politik, asnjë zgjidhje politike në Shqipëri nuk do të bëhet pa pasur në themel të saj ndëshkimin e të gjithë atyre që kanë vjedhur votat e shqiptarëve. Asnjë marrëveshje politike për daljen nga kriza nuk do mund të arrihet, nëse pika numër 1 e saj nuk është ndëshkimi i vjedhësve të votave”, deklaroi Basha.
Sipas tij, skema e shitblerjes së votave dhe vjedhjes ka timonierin e këtyre, jo vetëm në Durrës dhe Dibër, por edhe në të gjithë Shqipërinë. Më tej kryedemokrati, tha se duhet ndalur tani makineria kriminale e drejtuar nga Rama.
“Përgjimet tregojnë qartë se çfarë komunikimi dashamirës ka mes ministrit, kriminelit e shefit të policisë. Po të mos i njohësh nuk i dallon dot kush është polici e kush trafikanti, kush deputeti e kush krimineli, kush ministri e kush shefi i policisë. Në Dibër policët ju kanë garantuar hapur të fortëve dhe kriminelëve të mbillnin drogë në favor të marrjes së votave. Ai ishte një projekt shkatërrues për vendin, se jo vetëm kapi ekonominë por e shkatërroi atë. Ekonomia sot është bërë e varur nga droga njësoj si Rama e qeveria e tij”, tha Basha.
Basha paralajmëroi dhe Sandër Lleshajn se do të mbajë përgjegjësi ai dhe të gjithë drejtorët e policisë. “Sandër Lleshaj është vegla më e ftohtë dhe e pashpirtë e Ramës për të nxitur vëllavrasjen. Shumë shpejt ai do të mbajë përgjegjësi për helmimin, dhunimin dhe persekutimin që u ka bërë shqiptarëve për të mbrojtur Edi Ramën. Edhe drejtorët e policisë nga Ardi Veliu tek Roland Hysajt me shokë do të jeni në burg shumë shpejt. Në qelitë që sot është Bardh Spahia do të jetë njëri prej jush”, theksoi Basha. Ai i bëri thirrje qytetarëve që t'i bashkohen protestës së nesërme.
Pas kësaj deklarate ka reaguar edhe ministri i Brendshëm, Sandër Lleshaj, i cili i cilësoi sulmet në adresë të tij si degradim të politikës.
“Lulzim Basha vazhdon të hedhë natën zjarr dhe ditën kërcënime kundër shkollave, zgjedhjeve, Policisë etj. Natën bëhet guerrilas dhe ditën prokuror, ndërkohë që është thjesht një i pandehur i shumëfishtë. Keqardhje për degradimin”, shkruan Lleshaj në Twitter.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.