Politike

Basha nga Britania: S’ka zgjedhje pa shkëputur krimin nga politika

Nga Parlamenti britanik, kreu i PD-së, Lulzim Basha ka përsëritur edhe njëherë kushtet e opozitës për zgjidhjen e krizës politike në vend.

I pranishëm në një vizitë në Westminster, Basha theksoi se nuk mund të ketë zgjedhje të lira pa u ndëshkuar politikanët që u kapën në bashkëpunim me krimin e organizuar duke vjedhur vota.

Ai ka dhënë një mesazh të forte, se nuk do të ketë zgjedhje pa u ndëshkuar politikanët që vodhën me krimin zgjedhjet e 2017!

“Zgjedhjet e diktuara nga krimi janë rrënja e krizës, sepse kanë prodhuar një parlament të diktuar nga krimi dhe jo nga vota e shqiptarëve. Politikanet që janë kapur në bashkëpunim me krimin e organizuar për të vjedhur zgjedhjet e 2017-ës, duhet të ndëshkohen dhe jo të promovohen. Pa shkëputur lidhjet e krimit me politikën nuk mund të ketë zgjedhje të lira dhe të ndershme. Largimi i qeverisë dhe kryeministrit të kapur në flagrancë duke bashkëpunuar me krimin për të shkatërruar procesin zgjedhor të 2017 dhe krijimi i një qeverie tranzitore janë mënyra e vetme për zgjidhjen politike të krizës” – theksoi Basha.

Gjatë vizitës në Westminster, Lulzim Basha dhe delegacioni që e shoqëron, zhvilluan një takim me kryesuesit e Grupit Parlamentar bipartizan për Shqipërinë në Parlamentin Britanik, deputetët John Grogan (kryetar i grupit) dhe Martin Vickers (nën kryetar).

Në këtë takim u diskutua gjerësisht për shkaqet e krizës politike në Shqipëri, për krizën kushtetuese, mungesën e Gjykatës Kushtetuese, mungesën e Gjykatës së Lartë, mungësën e një Prokurorie të pavarur që nuk i mbyll, por i heton dosjet e krimit të lidhur me pushtetin.

Delgacioni, i përbërë edhe nga Kryetari i PR, Fatmir Mediu, Aldo Bumçi dhe Xhemal Gjunkshi, zhvilloi një takim në Dhomën e Lordëve me Lordin Peter Boëness, zv Presidenti i Asmblesë Parlamentare të OSBE-së dhe njëherësh, anëtar i Dhomës se Lordëve në Parlamentin Britanik.


Copyright © Gazeta “Si”


Më Shumë