Lulzim Basha doli mbrëmjen e së hënës, disa orë pas publikimit të serisë me 16 audiopërgjime nga ana e Bild për të deklaruar se publikimet në fjalë legjitimojnë akuzat e hershme të opozitës ndaj mazhorancës së drejtuar nga Edi Rama.
“Si njeriu që për gjashtë vjet rresht është përpjekur çdo ditë t’i bëjë njerëzit të shikojnë atë, që sot është shpalosur hapur para syve dhe veshëve të gjithë botës, do të duhej që sot të ndjehesha mirë dhe i çliruar nga një barrë e madhe. Sot, kur nuk ka më njeri që nuk është bindur se i vetmi projekt që ka patur Edi Rama është plaçkitja e Shqipërisë përmes pushtetit në ortakëri dhe aleancë me çdo keqbërës të mundshëm, nga ata të botës së malavitës tek ata të botës së mercenarëve publikë”, deklaroi Basha.
Kreu i PD-së thotë se në vend të gëzimit për publikimet e Bild, sot ndjehej i shqetësuar dhe trishtuar për gjendjen se ku ka përfunduar shoqëria shqiptare.
“Jam i trishtuar, sepse sot një votë kushton 4 mijë lekë në pazarin e mosbesimit dhe tradhtisë që politika u ka bërë interesave të njerëzve të thjeshtë. Ky është dënimi më i rëndë që mund t’i bëhet politikës, sepse një politikë që ka humbur besimin e njerëzve ka humbur çdo gjë. Ky është dënimi më i madh që mund t’i bëhet një shoqërie, sepse kur politika nuk është më mjet në duart e njerëzve do të thotë se në atë shoqëri nuk ka më liri dhe demokraci”, vijoi ai.
Basha akuzoi mazhorancën aktuale se e ka shndërruar shteti në një lukuni banditësh, qëllimi i vetëm i të cilëve është plaçkitja dhe dhunimi i njerëzve. Fajtor për këtë thotë se ka vetëm një person.
“Edi Rama është fajtori kryesor për gjendjen ku ne ndodhemi, ai është dhe do të shënohet në historinë tonë si një figurë thellësisht kriminale. Historia nuk blihet me para dhe Edi Rama nuk e blen dot historinë as me paratë e gjithë drogës dhe të krimit të botës. Por Edi Rama nuk është shpjegimi i vetëm i gjendjes ku ne jemi”, vijoi Basha.
Basha pranoi se oligarkia dhe oligarkët nuk lindën me Edi Ramën, por thotë se me Edi Ramën ata u fuqizuan në mënyrë marramendëse. Rama, sipas kreut të PD-së është strumbullari i gjithë problemeve të sotme të vendit.
“Edi Rama është kriminel me të cilin duhet të merremi para se të merremi me çdo gjë tjetër. Pa largimin e Edi Ramës dhe të klikës kriminale që është sot në pushtet nuk do të ketë asnjë hap përpara“, vijoi kreu i PD.
Kreu i PD-së vijoi i bindur se opozita nuk do të tërhiqet nga rruga dhe kauza e saj dhe ftoi qytetarët në protestën e 21 qershorit.
“Unë dhe demokratët nuk mund të tërhiqemi dhe nuk do të tërhiqemi kurrë nga këto dy objektiva çliruese për Shqipërinë.Sot është e qartë se largimi nga parlamenti dhe braktisja e zgjedhjeve farsë ishin vendimet e duhura. Pa asnjë mëdyshje. Qëndrimi në këtë Kuvend dhe pjesëmarrja në zgjedhje farsë do të na kthente në fasadë të pushtetit të krimit. Me krimin nuk mund të ketë dialog, nuk mund të ketë negociata dhe as nuk mund të bëhen lëshime. Ky është standart perëndimor. Unë dhe të gjithë demokratët do t’i qëndrojmë deri në fund këtij standarti: Me krimin nuk ka negociata dhe marrëveshje”, shtoi Basha.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.