Balluku në bypass-in e Tepelenës: Do të përfundojë para afatit

Ministrja e Infrastrukturës dhe Energjisë, Belinda Balluku gjatë inspektimit të punimeve në by-passin e Tepelenës u shpreh se vepra duhet të përfundojë përpara afatit të parashikuar në kontratë pavarësisht se bëhet fjalë për një vepër me kompleksitet të lartë.

Minstrja Belinda Balluku inspekton punimet tek by passi i Tepelenës

Përfaqësuesit e kompanisë, që po realizojnë punimet, sqaruan se janë vendosur një numër i madh pilotash për të siguruar mbrojtjen e shpatit të kalasë dhe shtati të lumit, si dhe ndërhyrjet e tjera që pritet të realizohen me qëllim ofrimin e një vepre me cilësi dhe standarde për qytetarët.

“Parashikohet një segment rreth 2.1 kilometra i gjithi që do bëhet rrugë me të gjitha standardet, me dy korsi kalimi, me trotuar. Është parashikuar mbrojtja lumore e cila në masën 99 përqind është përfunduar duke u vendosur pilota dhe perde të papërshkrueshme nga uji për ta siguruar të gjithë shpatin pasi kishim probleme të gërryerjes nga lumi. Gjithë shpati i kalasë do mbushen të gjitha zgavrat ku ka gërryerje erozioni, do mbushen me beton dhe gurë dhe pastaj do vendoset rrjeta për ta zgjidhur një herë e mirë këtë problem që ka pasur kalaja e cila rrezikohej në aspektin e qëndrueshmërisë së shpatit”, deklaroi inxhinieri i firmës kontraktore.

Drejtoresha e ARRSH, SonilaQato bëri të ditur se për shkak të qarkullimit të dendur që ky aks ka gjatë sezonit turistik do të merren masa paraprake për të lehtësuar lëvizjen e drejtuesve të mjeteve.

“Po marrim masa provizore që për sezonin turistik aksi të jetë i lirë dhe të mos krijojë shqetësime për trafikun dhe ngarkesën që do ketë rruga ku do të lidhet me jugun e vendit”, u shpreh Qato.

“Strategjia e re për të kompensuar të gjitha humbjet e kohës në të shkuarën është që të dorëzojmë vepra para afatit. Kjo është diçka që po e bëjmë gjashtë mujorin e fundit dhe duam që të vazhdojmë me të njëjtin ritëm. E njohim kompleksitetin, sigurisht siguria qoftë gjatë punimeve dhe qoftë cilësia që mbetet në përfundim të projektit janë shumë të rëndësishme për ne megjithatë kemi një dëshirë të madhe t’i dorëzojmë të gjitha veprat qoftë edhe në një kohë të shkurtër para afatit”, nënvizoi ministrja Balluku.
Deri më tani janë vendosur mbi 300 pilota, përjashto mbrojtjen lumore, ndërsa parashikohet ndërtimi i trotuareve tek segmenti përgjatë pjesës së kalasë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.