.png)
Nga Gazeta ‘Si’- Kreu i Grupit Parlamentar të Partisë Socialiste, Taulant Balla, ka kërkuar që Kuvendi i Shqipërisë të dënojë dhunën ndaj punonjësve të Policisë së Shtetit gjatë protestës së zhvilluar jashtë Parlamentit.
Në fjalën e tij në seancë plenare, Balla deklaroi se disa efektivë të policisë janë lënduar gjatë përplasjeve me protestuesit dhe kërkoi reagim nga institucionet e drejtësisë për personat përgjegjës.
“Duhet të shprehim solidaritetin me punonjësit e Policisë të plagosur nga dhuna e disa elementëve që kanë goditur punonjësit e Policisë së Shtetit”, u shpreh Balla, duke kërkuar që Kuvendi të mbajë një qëndrim kundër akteve të dhunshme.
Socialisti kritikoi ashpër Partinë Demokratike për mënyrën se si, sipas tij, ka reaguar ndaj incidenteve në protestë. Ai akuzoi opozitën se nuk është distancuar nga dhuna dhe se po mbështet veprime që tejkalojnë kufijtë e një proteste qytetare.
Gjatë deklaratës së tij, Balla hodhi edhe akuza për persona me lidhje, sipas tij, me struktura ekstremiste jashtë vendit, duke pretenduar se disa individë të përfshirë në protestë kanë lidhje me Gardën Revolucionare të Iranit.
Ai u shpreh më tej se goditja ndaj punonjësve të Policisë përbën sulm ndaj shtetit dhe kërkoi që organet e drejtësisë të veprojnë ndaj autorëve të incidenteve.
“Gjaku i punonjësve të Policisë së Shtetit është gjaku i vetë shtetit. Kush ngre dorë mbi një punonjës policie, ngre dorë kundër shtetit”, deklaroi Balla.
Në pjesën më të debatueshme të fjalës së tij, kreu i grupit socialist përdori tone të ashpra ndaj opozitës, duke e akuzuar atë se është ndikuar nga protesta dhe nuk ka mbajtur qëndrim kundër dhunës.
Debati në Kuvend u zhvillua pas tensioneve të regjistruara jashtë Parlamentit, ku pati përplasje mes protestuesve dhe forcave të rendit, përdorim të ujit me presion dhe gazit lotsjellës, si dhe raportime për të lënduar nga të dyja palët.
Opozita ka deklaruar se përgjegjësia kryesore lidhet me mënyrën e menaxhimit të protestës nga policia dhe ka kërkuar që të respektohet e drejta e qytetarëve për tubim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje