Ministri i Brendshëm Taulant Balla, deklaroi në Parlament se shtesat në ligjin për prefektin, synojnë një ridimensionim të rolit të tij në misionin e tij ashtu edhe në kompetenca. Nga ana tjetër, deputetja e PD-së, Dhurata Çupi argumentoi se prefektura është institucion i dështuar dhe duhet të shfuqizohet.
Madje, këtë projektligj Çupi e konsideroi si ndër më qesharakun ndonjëherë.
“Domosdoshmëria për këto ndryshime erdhi si nevojë për të rritur efiçencën dhe përforcimin e rolit të prefektit”, deklaroi Balla.
Por këto ndryshime, nënvizoi ministri, “nuk ndikojnë në vetëqeverisjen lokale”.
Tjetër shtesë e cila u diskutua ishte edhe ngritja e këshillave vendor të sigurisë publike. Në këtë pikë, sipas ministrit, i vihet rëndësia rolit të prefektit që të ndërlidhet me Ministrinë e Mbrojtjes për situata te vështira në raste të emergjencave civile.
Sipas Çupit, institucioni i prefektit është kthyer në një pozicion pensionistësh dhe se nuk e kryejnë detyrën e tyre.
“Nuk mundet që prefekti të detyrojë bashkinë që të ngrejë grupe pune apo të këshillave vendor, sepse kjo do të bënte të mundur kontrollin e bashkisë nga qeveria”, vijoi deputetja.
Institucioni i prefekturës, nënvizoi Çupi duhet të shfuqizohet që sot dhe jo t’i jepen kompetenca “me shtesa të kota”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.