Edhe një trofe tjetër i fituar dhe hapi i dytë drejt tripletës. Pas fitimit të titullit kampion në Bundesligë, Bajern Mynih ka fituar edhe Kupën e Gjermanisë, pasi mundi në finale 4-2 Bajer Leverkusenin. Vendimtarë ishin golat e Alabës që në minutën e 16-të dhe Gnabrit në të 24-ën.
Në pjesën e dytë, sulmuesit polak, Robert Levandovksi, ishte autori i një dopiete, ndërsa golat e Bender dhe Havertz patën vetëm vlera statistikore për Leverkusenin. Skuadra e trajnerit Flik e diktoi ndeshjen nga fillimi në fund, edhe pse lojtarët nuk ishin në gjendjen optimale fizike. Bajerni zbriti në fushë me skemën klasike 4-2-3-1, me Koman dhe Gnabri në krahët e sulmit dhe Mylerin pas Levandovskit. Tashmë objektivi i bavarezëve është Liga e Kampionëve.
Për Bajernin ishte finalja e 24-t në Kupën e Gjermanisë, më shumë se çdo skuadër tjetër. Bavarezët e kanë fituar 20 herë këtë trofe, 2 të fundit radhazi. Robert Levandovski ka shënuar golin e 8-të personal në 8 finale të Kupës së Gjermanisë që ka luajtur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.