Surprizë në javën e dytë të Bundesligës, Hofenheimi mund 4-1 Bajernin e Mynihut. Kampionët e Gjermanisë dhe të Europës nuk humbnin një ndeshje zyrtare prej dhjetorit të vitit të kaluar. Hofenheimi shënoi 2 gola në 24 minutat e para me Biçakçiç dhe Dabur, Kimish rihapi ndeshjen në pjesën e dytë, por më pas kroati Kramariç realizoi edhe dy gola të tjerë për vendësit.
Nuk mjaftoi futja në fushë në pjesën e dytë e Levandovskit, i cili e nisi nga stoli ndeshjen. Vendin e tij e zuri Zirkze, i cili goditi traversën. Nga stoli e nisi ndeshjen edhe Goretzka, që i la vendin francezit Toliso. Ekipi i fundit që kishte mundur Bajernin është Borusia Mënshengladbah, më 7 dhjetor 2019. Bajerni mbetet në kuotën e 3 pikëve në kampionat, ashtu si Borusia Dortmund, kurse Hofenheimi udhëheq me 6 pikë, bashkë me Augsburgun.
Një humbje tronditëse ka pësuar Mançester Siti në Angli. Skuadra e Pep Guardiolës u mund 2-5 në fushën e vet nga Leiçesteri, i udhëhequr nga një Vardi i papërmbajtshëm, autor i 3 golave në këtë ndeshje. Siti e nisi ndeshjen në avantazh, me golin e Mahrez, por më pas gjithçka u përmbys dhe kundërshtari shënoi 5 herë. Një ndeshje për t’u harruar për Guardiolën dhe të tijtë. Sot luhet sfida mes Liverpulit dhe Arsenalit.
Në Spanjë, Barcelona ka mundur 4-0 Vilarrealin. Gjithçka është vendosur brenda pjesës së parë nga 2 golat e Ansu Fatit, 1 gol i Mesit dhe një autogol i miqve. Luis Suarez debutoi në mënyrën më të mirë me Atletiko Madrid, teksa në 20 minuta lojë shënoi 2 gola dhe dha një asist në fitoren 6-1 ndaj Granadës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.