.png)
Ndërkohë që Partia Socialiste i bëri thirrje gjatë Kongresit për dialog, selia blu është përgjigjur duke publikuar disa dokumente dhe përgjime mbi çështjen “Babale” , të cilat sipas saj vërtetojnë lidhjet e qeverisë më krimin.
Ish-deputeti demokrat Ervin Salianji ka publikuar përmes një konference për shtyp dokumente dhe videot me transkriptim, duke deklaruar se ato janë provat e përfshirjes së Taulant Balla në këtë skemë mashtrimi dhe se Prokuroria po fsheh çdo provë lidhur me çështjen ‘Babale’.
Salianji i cili është marrë i pandehur nga Prokuroria për publikimet e përgjimeve të dosjes ‘Xhafaj-Babale’ publikoi disa nga përgjimet ku sipas tij tregohet një komunikim mes Fredi Alizotit dhe Drejtorit të Policisë së Fierit, Albert Nushi.
Nga përgjimet, duket se Fredi Alizoti i ankohet Drejtorit të Policisë së Fierit se e kanë lënë në baltë, ndërsa ky i fundit i premton në fund se do t’i nisë një sasi lekësh. Salianji tha se Fredi Alizoti ka folur dhe me Taulant Ballën përpara se të fliste me zyrtarin e policisë.
“Përgjimet dëshmojnë vënine e qeverisë në shërbim të krimit për të shpëtuar ministrin e brendshëm, Xhafaj. Përgjimet faktojnë sajimin e dëshmitarit të rremë dhe gjithçka kemi thënë lidhur me përfshirjen e vëllait të ministrit të Xhafajt”, deklaroi Salianji. Përgjimet që do të publikojmë sot janë vetëm një pjesë, por ashtu si dhe të tjerat, faktojnë qartazi që Prokuroria jo vetëm që i fsheh dhe është në shërbim të kryeministrit, por ashtu nuk denjon t’i transkriptojë. E bën me qëllim që të fshehë emërimin e drejtuesit të policisë dhe gjithashtu edhe emrin e një zyrtari të lartë, Taulant Ballës dhe përfshirjen e tij në sajimin e shumëpërfolur”, shtoi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
