Shtyhet seanca gjyqësore në GJKKO për Redjan Rrajën dhe Ariol Halilajn, të cilët po përballen me drejtësinë, pasi dyshohet se kanë qenë të përfshirë në atentatin ndaj ish-prokurorit Arjan Ndoji, ngjarje e ndodhur më 1 nëntor të vitit 2019.
Mësohet se shkak për shtyrjen e seancës është bërë fakti që nuk janë paraqitur të dëmtuarit nga vepra penale, si ish-prokurori Ndoji, miku i tij Rrumi dhe familjarët e të ndjerit Andi Maloku, që ndodheshin bashkë në makinë, kur iu bë atentat në nëntor të vitit 2019.
Gjykata e Krimeve të Rënda caktoi masën e sigurisë “Arrest me burg” për Redjan Rrajën, pasi akuzohet nga prokuroria si një nga atentatorët ndaj prokurorit Arjan Ndoja, që mbeti i plagosur më 1 nëntor 2019 në mbikalimin e Shkozetit.
Prokurori Rraja ishte në makinë me Landi Muharremin, një person me precedentë penalë, dhe shoferin e tij Andi Maloku, i cili ndërroi jetë në Spitalin e Traumës në Tiranë.
Deri më tani, Redjan Rraja ka mohuar të ketë lidhje me atentatin, ndërsa më herët është shprehur se nuk ka dijeni se si janë gjendur gjurmët e tij në makinën e atentatorëve.
Arjol Halilaj akuzohet se ka qenë në rolin e shoferit, në mjetin nga ku dolën plumbat e kallashnikovit dhe vërshuan mbi makinën ku po udhëtonte Ndoja, miku i tij Pëllumb Ymeri, i njohur si Rumi (të dy u plagosën) dhe i ndjeri, Maloku.
Pas krimit ai ka larguar autorët nga vendngjarja dhe Rrajën e ka strehuar në banesën e tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
