.png)
Gjykata e Tiranës ka lënë në burg 4 të dyshuarit për atentatin e dështuar ndaj biznesmenit Andon Dhima.
Prokuroria tha në sallën e gjyqit se Grid Lena dhe Albin Hoxha, ish-komando, ishin dy personat e armatosur dhe me fytyrë të mbuluar më maska silikoni, të cilët tentuan të ekzekutonin biznesmenin, pavarësisht se në momentin e fundit, ata u tërhoqën, pasi Dhima hyri në ashensor dhe nuk arritën të qëllonin në drejtim të tij.
Enea Hoxha vëllai i ish-komandos dhe Mariglen Matohiti, kunati i Lenës, dyshohet sipas prokurorisë të kenë pasur rolin e vëzhguesit.
Prokuroria thotë se në gjurmët e të dyshuarve ra përmes pamjeve të kamerave të sigurisë, që e orientuan deri në shtëpinë e Grid Lenës. Pas vënies në përgjim të të dyshuarit u zbuluan mesazhe kompromentuese, pasi ata komunikonin me njëri-tjetrin dhe shprehnin shqetësim se kishin dalë duarbosh, pra pa mundur të përmbushnin misionin.
Mesazhet u përdorën si provë në seancë. Të dyshuarit mohuan përfshirjen në ngjarje, por s’e bindën dot gjykatën t’i linte të lirë.
Bashkëshortja e Grid Lenës dhe njëherazi motra e Mariglen Matohitit, tha për gazetarët se ata s’kanë asnjë lidhje me atentatin e dështuar ndaj biznesmenit, përderisa janë gjendur në një ditëlindje në të njëjtën kohë kur ndodhi krimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
