Çfarë shije ka një banane e ngjitur në mur në instalacionin e artistit italian Mauricio Cattelan, e që sipas galerisë “Art Basel Miami Beach” është vlerësuar të paktën 120 mijë dollarë? Këtë e zbuloi një tjetër artist.
David Datuna, një artist gjeorgjian me origjinë, por që e ushtron profesionin e tij në Nju Jork prej kohësh, hyri si vizitor në galerinë ku ekspozohej vepra e kolegut të tij italian dhe pa u menduar dy herë e shqiti atë nga muri, e zhveshi dhe e hëngri. Të gjithë këtë e bëri në sy të kameras.
“Artisti i uritur! Performancë e imja. E dashuroj veprën e Maurizio Cattelan dhe më pëlqen instalimi i tij. Është shumë i shijshëm”, shkroi ai në Instagram duke ironizuar si të mbivlerësuar veprën e artistit italian.
Organizatorët ndërhynë duke e zëvendësuar bananen e ngrëne me një tjetër, ndërsa veprimi i shkaktoi jo pak telashe artistit gjeorgjian me stafin e galerisë “Arta Basel Miami Beach”.
“Çmenduri! Shumë çmenduri”, i drejtohet njëra nga organizatoret e ekspozitës.
Sa mund të shkojë vlera artistike e një bananeje 30 lekëshe të kapur me një copë ngjitësi pa vlerë në një mur?
Nëse kjo është vepër e artistit italian, Maurizio Cattelan i gjithë instalimi mund të shitet për 12 mijë dollarë. Kjo është shuma që organizatorët e ankandit në galerinë “Arta Basel Miami Beach” deklarojnë se kanë shitur dy vepra të tilla.
Suksesi i tyre kanë bërë që organizatorët instalacionin tjetër ta vendosin në shitje për 150 mijë dollarë.
Maurizio Cattelan është i famshëm për ndërtimin e bidesë së artë, që u vodh së pak kohë më parë nga Blenheim Palace në Oxfordshire të Britanisë së Madhe, por që prej krijimit të kësaj vepre ka ruajtur një profil të ulët, të paktën ndërkombëtarisht.
“Pas 15 vitesh në hije, Maurizio u rikthye në arenën ndërkombëtare të artit dhe ne jemi me fat që po bashkëpunojmë me të”, tha një zëdhënës i “Art Basel Miami Beach” për Sky Neës.
Por cila është përmbajtja e instalacionit të bananes me një ngjitëse në mur?
“Banania përfaqëson shumë gjëra. Është simbol i tregtisë globale dhe një mjet klasik humori, qoftë humor i rëndomtë, qoftë humor i rafinuar. Maurizio ka aftësinë që i merr këto objekte të rëndomta dhe i transformon në makineri kënaqësie artistike, por njëkohësisht edhe kritike”, thotë “Arta Basel Miami Beach” përmes zëdhënësit të saj.
Sarah Cascone, gazetare kulture në Majemi thotë se vepra e artistit italian është në qendër të bisedave këto ditë në këtë qytet. Faqja e internetit “Artnet” thotë se dy veprat e para iu shitën dy francezëve.
Sa i takon instalacionit të tretë, Cattelan, që bananet i ka blerë nga një supermarket në Majemi, kërkon që t’i shitet një muzeu dhe sipas raportimeve deri më tani kanë bërë ofertat e tyre dy institucione të tilla.
Artisti italian tha për “Artnet” se ka punuar me idenë prej vitesh dhe versionet e para i krijoi në bronz dhe plastikë. “Por, sa herë që udhëtoja kisha në kokë këtë idenë e bananes në mur dhe nuk po gjeja dot zgjidhjen se si ta përfundoja këtë ide. Një ditë, u zgjova në mëngjes dhe mendova: “banania mbetet një banane”.
Pronari i galerisë, Emmanuel Perrotin mohoi të gjitha zërat se vepra e Maurizio Cattelan është thjesht një shaka. Ai tha për “Artnet” se çdo aspekt i veprës është vlerësuar me kujdes, që nga forma dhe përmasat e bananes, këndi i ngjitjes në mur, ndriçimi e deri tek mënyra e ngjitjes.
Vepra është titulluar “Comedian” dhe blihet bashkë me një certifikatë autenticiteti. “Miami Herald” thotë se blerësit mund të ndryshojnë vetëm bananen, kur ajo prishet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.