.png)
Gazeta Si - Blogeri rus pro luftës, Igor Girkin, i cili e ka kritikuar strategjinë ushtarake të Rusisë në Ukrainë, është arrestuar në Moskë, nën akuzat për ekstremizëm.
Nacionalisti i linjës së ashpër, i njohur edhe si Igor Strelkov, mund të dënohet me deri në pesë vjet burgim.
Gruaja e tij ka thënë se ai është arrestuar të premten në banesën e tij në Moskë. Ai më pas ka dalë para një gjykate në distriktin Meshçanski në verilindje të Moskës dhe pritet të jetë në paraburgim deri më 18 shtator.
Në kohën kur lufta e Rusisë në Ukrainë pati ngecur disa herë vitin e kaluar, kritikat e Strelkovit ndaj dështimeve të ushtrisë dhe presidentit rus, Vladimir Putin, vetëm sa janë shtuar.
“Ne veçse kemi humbur”, u pati thënë ai ndjekësve të tij në rrjetet sociale vitin e kaluar. Prej nisjes së luftës në Ukrainë, kritikët e konfliktit në Rusi janë përballur me dënime të ashpra.
Si ish-kolonel i Shërbimit Federal të Sigurisë në Rusi, Strelkov ka luajtur rol kyç në aneksimin e Gadishullit ukrainas të Krimesë nga ana e Moskës, më 2014.
Strelkov ka qenë një prej tre burrave të dënuar në mungesë nga një gjykatë holandeze nëntorin e kaluar, për rolin e tij në një sulm me raketë në vitin 2014, ku u rrëzoi aeroplanin i kompanisë "Malaysia Airlines" në një zonë konflikti dhe për pasojë patën vdekur 298 personat në bord.
Në muajin shkurt, hulumtuesit ndërkombëtarë kanë thënë se ka “indikacione të fuqishme” se presidenti rus, Vladimir Putin ka qenë i përfshirë personalisht në këtë incident.
Rusia, në anën tjetër, e ka hedhur poshtë përfshirjen në rrëzim të aeroplanit. /REL/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
