Gazeta Si - Saudi Pro League është gati të marrë në kampionatin e saj ‘bilbilat’ më të mirë europianë. Kuptohet, duke afruar paga më të larta.
Muajt e fundit Arabia Saudite është kthyer në vend qendror për futbollin botëror. Pasi kanë marrë kampionë të mëdhenj, si Kristiano Ronaldo, Karim Benzema dhe Nejmar, sheikët janë gati për të afruar edhe arbitrat më të njohur ndërkombëtarë.
Sipas "The Times", Saudi Pro League po përpiqet të bindë disa arbitra anglezë për të drejtuar ndeshjet e kampionatit elitar, duke hapur kështu një derë për një merkato që nuk është parë deri më tani.
Në shënjestër nuk janë vetëm arbitrat anglezë, por edhe kolegë të tyre europianë, që më parë kanë shkuar në gadishullin arab për të drejtuar ndonjë miqësore. Diferencën edhe në këtë rast e bën faktori ekonomik. Majkëll Olivier, vetëm për të arbitruar ndeshjen mes Al Hilal dhe Al Nasr, ka përfituar 3.471 euro, më shumë se në Europë.
Ai udhëtoi me ‘business class’ deri në Rijad, ku u pagua me dyfishin e shpërblimit për një ndeshje të Premier Ligës. Gjatë një viti pagesat për një arbitër shkojnë në total nga 139.000euro në 347.000 euro. Standardi arbitrar në Arabinë Saudite së fundi është vënë në diskutim.
Ish-arbitri i Premier Ligës, Mark Clattenburg, ka pohuar se arbitrat e vëzhguar prej tij në vitet 2017 dhe 2018 "nuk kanë plotësuar standardet bazë dhe nuk kanë kuptuar mirë rregullat e lojës".
Nëse bisedimet, që tani janë në fazën fillestare, mbyllen me sukses, do të hapej një front i ri për botën futbollistike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.